Дональд Трамп Цагаан ордны засвартай холбоотойгоор Барак Обамагийн шүүмжлэлд хариу өглөө
АНУ-ын Ерөнхийлөгч Дональд Трамп болон тус улсын 44 дэх төрийн тэргүүн Барак Обама нарын хооронд Цагаан ордны их засварын ажлаас үүдэлтэй ширүүн маргаан өрнөж, хоёр тал харилцан мэдэгдэл хийлээ.
Барак Обамагийн зүгээс хийсэн егөөдсөн шүүмжлэлийн хариуд Дональд Трамп түүнийг "муу ерөнхийлөгч" байсан хэмээн тодорхойлж, төрийн түүхэн өв соёлыг хайрлан хамгаалах чадваргүй хэмээн хатуу шүүмжилсэн байна.
Маргааны эхлэл нь Барак Обама завсрын сонгуулийн хүрээнд Охайо болон Мичиган мужуудад Ардчилсан намын дэмжигчидтэй уулзах үеэр тавьсан илтгэлээс үүдэлтэй юм. Тэрбээр үг хэлэхдээ Дональд Трампын эхлүүлсэн Цагаан ордны өргөн цар хүрээтэй өөрчлөлт, тэр дундаа Зүүн жигүүрийг шинэчлэн буулгасан явдал, олон зуун сая ам.долларын өртөгтэй бүжгийн их танхим, нисдэг тэрэгний буудал болон хэт их алтадмал чимэглэлийг эрс шүүмжилсэн юм.
Тэр бүү хэл "Одоогийн Цагаан ордон Саддам Хусейний нээсэн "Cheesecake Factory" зоогийн газар шиг харагдаж байна" гэж егөөдөөд, энэ мэт тансаглалд цаг хугацаа, хөрөнгө үрэхийн оронд ард түмний амьжиргааны өртгийг бууруулах эдийн засгийн арга хэмжээ авах хэрэгтэй байсныг сануулсан байна.
Энэхүү шүүмжлэлд Дональд Трамп Миссисипи муж руу нисэхээр цэргийн баазад хүрэлцэн ирэх үеэрээ хариу тайлбар хийжээ. Тэрбээр Цагаан ордныг түргэн хоолны сүлжээ зоогийн газартай зүйрлэсэн нь Обама ямаршуухан тааруу ерөнхийлөгч байсныг илтгэнэ гээд, Цагаан ордон бол тус улсын төрийн гол бахархал, бэлгэ тэмдэг тул цэвэр цэмцгэр, өнгө будаг нь тэгш, багана болон ханын өрлөг нь нураагүй, бүрэн бүтэн байх ёстой гэж мэдэгдэв. Түүнчлэн Обама мэтийн улс төрчид цэвэр цэмцгэр байдал болон бохир завааны ялгааг ч үл мэддэг, төрийн нандин өвийг халамжлах сэтгэлгүй хэмээн зэмлэж, өөрийн цахим сүлжээгээр дамжуулан түүний өмнөх бодлогыг шүүмжилсэн байна.
Уг үйл явдал нь олон нийтийн болон улс төрийн түвшинд ч хүчтэй давлагаа үүсгэлээ. Бүгд найрамдах намын төлөөллүүд болон Трампын дэмжигчид Барак Обамаг жирийн иргэдийн амьдралаас тасарсан ихэмсэг хандлага гаргалаа хэмээн үзэж, "Cheesecake Factory" сүлжээ бол дундаж давхаргынхны өргөнөөр үйлчлүүлдэг нийтлэг газар хэмээн өмөөрсөн байна. Тэр ч бүү хэл АНУ-ын Сангийн сайд Скотт Бессент Вашингтон хот дахь тус сүлжээ зоогийн газарт биечлэн очиж хооллоод зогсохгүй, Чикаго хотод баригдаж буй Обамагийн төвийн төслийг "Дарт Вейдерийн бунхан" шиг хэмээн хошигнон хариу цохилт өгчээ.
Ийнхүү төрийн тэргүүний өргөөний өнгө төрхийг тойрсон хоёр удирдагчийн маргаан нь зөвхөн барилгын засварын сэдэв бус, харин завсрын сонгуулийн өмнөх соёлын болон үзэл суртлын томоохон сөргөлдөөн болон өргөжиж байна. Цаашид төрийн сангийн зарцуулалт болон нийгмийн үнэт зүйлсийг тойрсон энэхүү мэтгэлцээн улс төрийн хүрээнд илүү ширүүсэх төлөвтэй байна.
Эх сурвалж:
• life.ru
• news.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.