Ардчилсан намын бүлгийн дэд дарга нар албан тушаалаасаа чөлөөлөгдөх хүсэлтээ өгчээ
Улсын Их Хурлын гишүүн Б.Жаргалан, Ч.Лодойсамбуу, Х.Тэмүүжин нар Ардчилсан намын бүлгийн дэд даргын албан тушаалаас өөрсдийн хүсэлтээр чөлөөлөгдөх өргөдлөө хүргүүлжээ. Бүлгийн удирдлагын түвшинд үүссэн уг шийдвэр нь дотоод зөрчил болон хурлын ирц хүрэхгүй байгаагаас шалтгаалсан байх магадлалтай юм.
Тодруулбал, УИХ дахь Ардчилсан намын бүлгийн шинэ даргаар Б.Түвшин 2026 оны аравдугаар сарын 12-ны өдөр сонгогдон ажиллаж эхэлсэн. Гэвч шинэ дарга сонгогдсоноос хойших 14 хоногийн хугацаанд тус бүлэг ээлжит хурлаа зохион байгуулж чадаагүй бөгөөд үйл ажиллагаа нь үргэлжлүүлэн саатсаар байна.
Өнгөрсөн долоо хоногийн даваа гаргийн ээлжит хуралдаан ирц бүрдээгүйн улмаас хойшлогдсон бол өнөөдрийн хуралд ердөө гурван гишүүн хүрэлцэн иржээ. Ийнхүү гишүүдийн ирц дахин хүрээгүй тул хуралдааныг цуцлахаас өөр аргагүйд хүрчээ.
УИХ-ын гишүүн Б.Жаргалан, Ч.Лодойсамбуу, Х.Тэмүүжин нар бүлгийн үйл ажиллагааны гацаатай холбогдуулан албан үүргээсээ чөлөөлөгдөх хүсэлтээ албан ёсоор хүргүүлсэн нь нөхцөл байдлыг улам тодорхойгүй болгож байна.
Шинэ дарга сонгогдсоноос хойш ээлжит хурлаа хийж чадахгүй мухардалд ороод буй бүлгийн хувьд удирдлагын дэд бүтэц нь ийнхүү задарч эхэллээ. Бүлгийн дотоод үйл ажиллагааны энэхүү гацааг цаашид хэрхэн даван туулах эсэх нь тодорхойгүй байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.