АНУ ба ОХУ-ын удирдагчдын байр суурь Украины асуудлаар эрс зөрчилдөж байна
АНУ-ын Ерөнхийлөгч Дональд Трампын засаг захиргаа тав дахь жилдээ үргэлжилж буй Украины дайныг бизнесийн тохиролцооны замаар хурдан дуусгахыг зорьж байгаа ч ОХУ-ын Ерөнхийлөгч Владимир Путин стратегийн зорилгоосоо ухрахгүй байгаа нь талуудын дунд томоохон зөрүү үүсгэж байна.
CNN агентлагийн шинжээч Мэттью Чансын дүгнэснээр, Трамп энхийн гэрээг хоёр талын ашигтай хэлэлцээр гэж харж байхад Путин үүнийг Оросын геополитикийн ялалт байх ёстой хэмээн үзэж буй юм.
Уг зөрүүтэй байр суурийг ойртуулах зорилгоор Трампын тусгай элч Стив Виткофф 2026 оны аравдугаар сарын 21-ний лхагва гаргийн өдөр Санкт-Петербург хотноо Владимир Путинтэй гурван цаг орчим хугацаанд биечлэн уулзлаа. Энэхүү уулзалтын өмнөх өдөр Норвегийн нийслэл Осло хотод АНУ, Европын холбоо болон НАТО-гийн төлөөлөгчид Украины Ерөнхийлөгч Володимир Зеленскийтэй уулзаж, Москвад эдийн засгийн урамшуулал санал болгох энхийн хувилбаруудыг боловсруулаад байв. Гэвч Кремлийн гадаад бодлогын зөвлөх Юрий Ушаков барууны тавьсан эдгээр саналууд Украины хямралыг бодитоор шийдвэрлэхэд дорвитой ач холбогдолгүй гэж үзэн няцаасан байна.
Москвагийн тал АНУ-ын удирдагчийн дипломат амжилтад яаравчлах хүслийг ашиглан хэд хэдэн чиглэлээр буулт хийлгэж чадсан нь анхаарал татаж байна. Тухайлбал, Трампын засаг захиргаа завсрын сонгуулийн өмнө шатахууны үнийн өсөлтийг бууруулах үүднээс ОХУ-ын дизель түлшний экспортын хоригийг сулруулж, худалдан авалт хийх тохиролцоонд хүрсэн нь Киевийн эрх баригчид болон Европын холбоотнуудын хүчтэй шүүмжлэлд өртлөө. Үүний сацуу Виткоффын айлчлалтай зэрэгцүүлэн ОХУ 2022 оноос хойш хоригдож байсан 74 настай АНУ-ын иргэн Стивен Хаббардыг суллаж, үүнийгээ сайн санааны илэрхийлэл гэж зарласан бөгөөд Виткофф уг алхмыг өндрөөр үнэлжээ.
Санкт-Петербургийн хэлэлцээний дараа ОХУ-ын тал 2026 оны арваннэгдүгээр сарын 10-наас хойш АНУ, ОХУ, Украины гурван талт хэлэлцээг үргэлжлүүлэх саналыг зарчмын хувьд дэмжсэн тухай Юрий Ушаков мэдэгдэв.
Арабын Нэгдсэн Эмират Улсын Абу Даби хотод болох магадлалтай эдгээр хэлэлцээ нь дайны дараах аюулгүй байдлын бүтцийг хөндөх төлөвтэй байгаа ч Москва Донбассын бүс нутгийг бүрэн хяналтдаа авах шаардлагаасаа ухрахгүй гэдгээ тодорхой харуулсаар байна.
Дайны галыг зогсоож, хоригийг цуцлан худалдааг сэргээх замаар энх тайван тогтоох Вашингтоны төлөвлөгөө нь газар нутаг, цэрэг-стратегийн үр дүнг эрхэмлэсэн Москвагийн байр суурьтай зөрчилдөж байна. Хэдийгээр талууд яриа хэлэлцээний ширээнд дахин суухаар тохиролцсон ч суурь шаардлагууд огт ойртоогүй байгаа тул цаашдын үйл явц амаргүй байх төлөвтэй байна.
Эх сурвалж:
• kvia.com
• kq2.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.