В.Зеленский АНУ болон ОХУ-тай гурван талт дээд хэмжээний уулзалт хийхийг санал болгов
Украины Ерөнхийлөгч Володимир Зеленский Норвегийн нийслэл Осло хотод АНУ-ын тусгай төлөөлөгч болон Умард Европын орнуудын удирдагчидтай энхийн хэлэлцээний асуудлаар уулзалт хийлээ. Уулзалтын үеэр тэрбээр дайныг зогсоож, гал зогсоох гол нөхцөлүүдийг тохиролцох зорилгоор Украин, АНУ болон ОХУ-ын төрийн тэргүүнүүдийн түвшинд шууд гурван талт дээд хэмжээний уулзалт зохион байгуулах санал дэвшүүлсэн байна.
В.Зеленский өөрийн улсыг оролцуулахгүйгээр Украины хувь заяаг шийдэх аливаа хувилбарыг эрс эсэргүүцэж буйгаа мэдэгдэв. Ялангуяа АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин болон БНХАУ-ын дарга Ши Жиньпин нарын хооронд Киев хотыг тойрч хийхээр яригдаж байсан уулзалтын саналыг няцаасан юм. Тэрбээр "Украины оролцоогүйгээр Украины тухай асуудлыг шийдэхгүй" гэсэн байр сууриа чанд сахиж байгаа бөгөөд АНУ-ын тусгай төлөөлөгч Стив Виткофф энхийн шинэчилсэн төлөвлөгөөг танилцуулахаар Санкт-Петербург хотноо Владимир Путинтэй уулзахаар очсон байна.
Түүнчлэн талууд энхийн иж бүрэн төлөвлөгөөний хүрээнд Украинд олгох НАТО-гийн 5 дугаар заалттай дүйцэхүйц аюулгүй байдлын баталгаа, дайны дараах эдийн засгийн сэргээн босголт болон Европын аюулгүй байдлын асуудлыг нарийвчлан хэлэлцсэн байна.
АНУ-ын төлөөлөгч Украины талаас Оросын газрын тос боловсруулах үйлдвэрүүдэд дроноор цохилт өгөхөө зогсоохыг шаардсан бөгөөд Зеленский хэрэв Москва Украины эрчим хүчний дэд бүтцэд халдахгүй байвал эрчим хүчний салбарт түр эвлэрэл тогтооход бэлэн гэдгээ илэрхийллээ.
Эх сурвалж:
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.