ОХУ руу нүүсэн америк гэр бүл бүх хөрөнгөө залилуулан салжээ
АНУ-ын Техас мужаас ОХУ руу шилжин суурьшсан баптист шашинт Лео болон Шантель Хейрийн гэр бүл Орост их хэмжээний мөнгөө алдаж, улмаар гэрлэлтээ цуцлуулжээ.
Тэд 2023 оны арванхоёрдугаар сард гурван хүүхдийнхээ хамт Америк дахь үзэл суртлын нөлөө болон ЛГБТ хөдөлгөөнөөс холдох зорилгоор Орос улсад ирж суурьшжээ. Хосууд эх орноо орхихын өмнө бүх эд хөрөнгө, бизнесээ зарж борлуулан бэлэн ам.доллар болон биткойн болгон хувиргасан байна.
Тэд ОХУ-д ирээд эхний хугацаанд Москва мужийн Домодедово, Каширагийн орчимд байрлах нутгийн баптист сүмийн пасторын фермд амьдарчээ. Энэ үеэр сүмийн пасторын хүү өөрийн бизнест нь хөрөнгө оруулбал жилийн 28 хувийн ашиг өгөх амлалт өгсөн тул Хейрийн гэр бүл түүнд ойролцоогоор таван сая рубль итгэмжлэн шилжүүлсэн байна.
Гэвч хэлсэн хугацаанд амласан хүү болон үндсэн мөнгийг эргүүлэн өгөөгүй бөгөөд мөнгө шилжүүлсэн баримт нь паспортын мэдээлэлгүй, хууль зүйн хүчин чадалгүй болж таарчээ. Гэр бүлийн тэргүүн цагдаагийн байгууллагад хандсан боловч алдсан мөнгөө эргүүлэн авч чадаагүй аж.
Бүх хадгаламжаа алдаж санхүүгийн хүнд байдалд орсон гэр бүл хэд хэдэн газар орогносны эцэст Иваново хотод танилынхаа гэрт толгой хоргодохоор нүүжээ. Ийнхүү шилжин суурьшсанаас хойш бараг гурван жилийн дараа Лео, Шантель нар салах шийдвэр гаргаж, тэдний гэрлэлт албан ёсоор цуцлагдсан нь тодорхой болов.
Эхнэр Шантелийн тайлбарласнаар, тэдний харилцааны зөрчил бүр АНУ-д байхад эхэлсэн бөгөөд тэрбээр 20 орчим жил гэр бүлээ хадгалж үлдэхийг хичээж ирсэн байна. Гэвч шинэ оронд ирэхэд онгоцны нислэгтэй өдөр байрны түрээс нь цуцлагдсан зэрэг ахуй хүрээний бэрхшээл, хуримтлуулсан хөрөнгөө залилуулсан явдал болон талаар болсон төлөвлөгөө нь тэдний хамтын амьдралыг бүрмөсөн нураах сүүлчийн цохилт болсон гэжээ.
Эх сурвалж:
• dzen.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.