БИЧЛЭГ: Калифорни дахь номын санд хар баавгай нэвтэрч зөгийн бал, амттан иджээ
АНУ-ын Калифорни мужийн Моно тойргийн Маммот Лэйкс дэх нийтийн номын санд хар баавгай нэвтэрч, номын тавиуруудаар хэсүүчлэн ажилтнуудын хүнсийг идсэн хяналтын камерын бичлэг олон нийтийн анхаарлыг татаж байна.
Уг явдал 10-р сарын 14-ний лхагва гаргийн өглөө 06:00 цагаас 06:10 цагийн хооронд, тус номын сан 10:00 цагт албан ёсоор үүд хаалгаа нээхээс бараг дөрвөн цагийн өмнө болжээ. Камерын бичлэгт тэмдэглэгдсэнээр зэрлэг амьтан уншлагын танхимаар чөлөөтэй алхалж байгаад ажилтнуудыг ирэхээс өмнө өөрөө гарч явсан байна.
Хяналтын камерын бичлэгээс үзвэл баавгай номын тавиуруудын хооронд тайван алхаж, компьютерын төхөөрөмж, лавлах ширээ, сандал болон шинэ номын хэсгийг үнэрлэн шалгажээ. Улмаар номын сангийн ажилтнуудын хүнс хадгалдаг хэсэгт хүрч самрын тос, жигнэмэг, лаазалсан тоор болон лонхтой зөгийн балыг идэж дуусгасан байна. Энэ үеэр ном хэвлэл болон тавилга эд хогшилд ямар нэгэн хохирол учраагүй бөгөөд дотор нь хүн байгаагүй тул бэртэж гэмтсэн тохиолдол гараагүй юм.
Моно тойргийн номын сангуудын захирал Жозеф Бопп уг явдлын талаар тайлбарлахдаа, номын сангийн гадна хаалга бүрэн түгжээтэй байсан тул баавгай яг ямар гарцаар дотогш орсныг шалгаж байгаа гэв.
Сонирхолтой нь, баавгай номын санд нэвтрэн зөгийн бал идсэн өдөр нь зохиолч А.А.Милний "Винни Пух" ном 1926 оны 10-р сарын 14-нд анх хэвлэгдсэний 100 жилийн ойтой яг давхацжээ. Үүнтэй холбогдуулан Моно тойргийн Боловсролын газраас цахим сүлжээнд бичлэгийг түгээхдээ шинэхэн "баавгай-номын санч" алдарт үлгэрийн номыг хайж яваад амттан идсэн байх хэмээн хошигносон байна.
Зэрлэг байгалийн мэргэжилтнүүдийн үзэж буйгаар тус нутгийн хар баавгайнууд өвлийн ичээндээ бэлтгэж, хоол тэжээл эрчимтэй цуглуулж байгаа нь ийнхүү суурин газар руу нэвтрэх гол шалтгаан болжээ.
Албаны хүмүүс орон нутгийн иргэдэд хандан цонх хаалгаа байнга түгжих, баавгайд тэсвэртэй хогийн сав ашиглах, зэрлэг амьтдад хэзээ ч хоол өгөхгүй байх зэрэг аюулгүй байдлын дэглэмийг чанд сахихыг сануулж байна. Ийм төрлийн санамсаргүй тохиолдлоос сэргийлэхийн тулд байгууллага, иргэд хүнсний зүйлсийг ил задгай байлгахгүй байх, ан амьтадтай зэрэгцэн оршихдоо сонор сэрэмжтэй байх нь чухал юм.
Эх сурвалж:
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.