Трамп: Францад үүссэн эмх замбараагүй байдал нь цагаачлалын бодлоготой холбоотой
АНУ-ын Ерөнхийлөгч Дональд Трамп Франц улсад өрнөж буй эмх замбараагүй байдлыг цагаачлалын бодлоготой холбон буруутгаж, хилээ яаралтай хаахыг уриаллаа. Тэрбээр өөрийн Truth Social сүлжээгээр дамжуулан Франц улс цагаачлалын уршгаар сүйрч байгааг анхааруулаад, нөхцөл байдал хэтэрхий оройтохоос өмнө хяналтаа гартаа авах шаардлагатай хэмээн мэдэгдсэн байна.
Франц улсад амьжиргааны өртөг, инфляц, шатахууны үнийн өсөлт болон сургуулиудын тааруу орчин нөхцөлийг эсэргүүцсэн иргэд, ажилчид, сурагчдын жагсаал өнгөрсөн өдрүүдэд эрчээ авчээ. Гэвч уг эсэргүүцлийн хөдөлгөөн ширүүссээр дээрэм тонуул, галдан шатаалт бүхий томоохон үймээн самуун болж хувирсан юм. Тухайлбал, нийслэл Парис болон бусад томоохон хотуудад олон тооны автомашин, дэлгүүрийг галдан шатаасан бөгөөд баруун өмнөд бүсийн Лимож хотын захиргааны түүхэн барилгыг бүрэн шатаасан хэрэг гарчээ.
Дэгдсэн эмх замбараагүй байдлын улмаас Францын цагдаа, хүчний байгууллагууд улс даяар 1,800-2,400 орчим хүнийг саатуулан баривчлаад байна. Харин Францын Ерөнхийлөгч Эммануэль Макрон болон тус улсын Дотоод хэргийн яам тус хүчирхийлэлд цагаачдыг холбогдуулаагүй бөгөөд хэт зүүний үзэлт бүлэглэлүүд болон дээрэмчид үймээн дэгдээж, Бүгд найрамдах улсыг доройтуулахыг оролдсон хэмээн мэдэгдэв.
Түүнчлэн Трампын мэдэгдлийн өмнөх өдөр АНУ-ын Дэд ерөнхийлөгч байр сууриа илэрхийлсэн юм. Тэрбээр X сүлжээнд Лимож хотын захиргааны байр шатаж буй дүрс бичлэгийг нийтэлж, барууны либералууд олон ургальч байдлын нэрийдлээр хяналтгүй цагаачлал оруулж ирсний уршгаар ийм үр дагавар үүссэн хэмээн шүүмжилсэн байна.
Эх сурвалж:
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.