АНУ-д хүргэлтийн ажилтан руу гал нээж халдсан монголыг баривчилжээ

АНУ-ын Флорида мужийн Майами-Дэйд тойрогт хүргэлтийн үйлчилгээний ажилтан руу галт зэвсгээр буудаж, танхайрсан 33 настай Саруултуяа овогтой Хүслэн гэгчийг орон нутгийн хууль сахиулагчид баривчилжээ. Энэхүү ноцтой хэрэг аравдугаар сарын 12-ны даваа гаргийн өглөө 03:25 цагийн орчимд Кендалл Драйв гудамжинд орших орон сууцны цогцолборын гадна талбайд гарсан байна.

Хэрэг гарах болсон шалтгааны тухайд “Uber Eats” компанийн хүргэлтийн ажилтан захиалга хүргэж өгснийхөө дараа орон сууцны лобби орчимд тааралдсан эмэгтэйтэй богино хугацаанд ярилцжээ. Улмаар уг ажилтан 50 орчим минутын дараа түүний утасны дугаарыг авах зорилгоор буцаж ирэх үед эмэгтэйн найз залуу болох цахим орчинд "Khuslen Khan" нэрээрээ танигдсан С.Хүслэн саарал өнгийн "Шевроле Корветт" маркийн автомашинтай ирж, хүргэлтийн ажилтан руу зэвсэг тулган сүрдүүлсэн байна.

Сэжигтэн хүргэлтийн жолоочийг газар хэвтэхийг тушаасны дараа баруун өгзөг рүү нь буудаж шархдуулжээ. Түүнчлэн бууны бариулаар хохирогчийн толгой руу цохиж, 5 см орчим гүн шарх үүсгэснээс гадна толгойд нь буу тулган амь насыг нь хөнөөнө хэмээн заналхийлсэн байна.

Энэ үед хамт байсан эмэгтэй түүнийг болиулахаар оролдсон ч сэжигтэн хохирогчийг автомашинаа тойруулан хөөсөн бөгөөд ажилтан зугтаж амжин ойролцоох "Baptist Health South Miami" эмнэлэгт очиж яаралтай тусламж авсан тул амь наснаас нь холуур өнгөрчээ.

Майами-Дэйд тойргийн Шерифийн газрын алба хаагчид гэрчүүдийн мэдээллээр сэжигтний байршлыг тогтоон, хэрэг гарсан газраас 1.6 км зайд орших орон сууцнаас нь түүнийг саатуулжээ. Нэгжлэгийн явцад тухайн орон сууцнаас кокаин, кетамин, MDMA, марихуан, сэтгэцэд нөлөөлөх мөөг болон их хэмжээний тусгай жороор олгодог эм зэрэг олон төрлийн мансууруулах бодис илэрснээс гадна 11,400 ам.долларын бэлэн мөнгийг хураан авсан байна.

Майами-Дэйд тойргийн шүүгч Минди С.Глейзерийн шийдвэрээр түүнд галт зэвсэг ашиглан хүний амь бүрэлгэхийг завдсан, онц аюултай зэвсгээр бусдын биед халдсан, түүнчлэн зэвсэглэн хар тамхи хууль бусаар тээвэрлэсэн, хадгалсан зэрэг хэд хэдэн хүнд зүйл ангиар хэрэг үүсгэлээ. Шүүхээс сэжигтнийг батлан даалтад гаргахгүйгээр урьдчилан хорих шийдвэр гаргаад байна.