Украины арми Санкт-Петербург хотод дроноор цохилт өгч, газрын тосны байгууламжууд шатжээ
Украины зэвсэгт хүчин 2026 оны аравдугаар сарын 18-ны шөнө ОХУ-ын Санкт-Петербург хот болон Ленинград мужийн нутаг дэвсгэрт олон тооны дроноор цохилт өгсний улмаас нэг хүн амиа алдаж, 15 хүн бэртэж гэмтжээ.
Агаарын дайралтад бүс нутгийн стратегийн чухал аж үйлдвэр, дэд бүтэц өртжээ. Тухайлбал, Балтийн тэнгисийн эрэг дэх хамгийн том түшиц болох Санкт-Петербургийн газрын тосны терминал болон "Ручьи" газрын тосны баазад их хэмжээний гал гарсан байна. Үүний зэрэгцээ Оросын цахим худалдааны "Ozon" компанийн логистикийн агуулах, нийгмийн сүлжээний "VK" компанийн дата төв цохилтод өртөж, логистикийн төвийн ажилтнуудыг нүүлгэн шилжүүлжээ.
Хотын "Восточная" цахилгаан дэд станц болон вантовын гүүр гэмтсэний улмаас Янино зэрэг суурин газрын 20,000 орчим оршин суугч цахилгаан эрчим хүчний тасалдалтай нүүр тулсан байна. Мөн нийт 12 орон сууц, хоёр амины сууц эвдэрч гэмтсэн бөгөөд ил зогсоолуудад байсан олон арван автомашин шатаж бүрэн сүйджээ.
Аюулгүй байдлыг хангах үүднээс Санкт-Петербург хотын "Пулково" олон улсын нисэх буудал үйл ажиллагаагаа 7-8 цагийн турш зогсоож, олон арван нислэгийг хойшлуулсан байна. Ленинград мужийн амбан захирагч болон хотын дарга нарын мэдээлснээр агаарын довтолгооноос хамгаалах систем тухайн бүсэд 127-145 орчим дроныг устгажээ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.