Кени улсад Эбола вирусийн халдварын найм дахь тохиолдол бүртгэгджээ
Кени улсад Эбола вирусийн халдвар авсан найм дахь тохиолдол батлагдсаныг тус улсын Эрүүл мэндийн ерөнхий газрын дарга мэдээллээ. Шинжилгээнд хамрагдсан 38 иргэний нэгээс нь вирус илэрсэн бөгөөд өвчтөн нь 49 настай эрэгтэй, эмнэлгийн туслах ажилтан болохыг албаныхан тогтоосон байна.
Халдвар авсан туслах ажилтан нь Кенид бүртгэгдсэн анхны өвчтөнийг асарч, цэвэрлэгээ хийж байхдаа вирус авсан бөгөөд тусгаарлалтад байх хугацаандаа халуурах, толгой болон булчингаар өвдөх зэрэг шинж тэмдэг илэрч байжээ. Тус улсад бүртгэгдсэн бүх тохиолдол Бүгд Найрамдах Ардчилсан Конго Улсаас Угандагаар дамжин Найроби хотод ирээд нас барсан 40 настай эрэгтэйгээс улбаатай гэж албаныхан үзэж байна. Одоогоор нийт найман тохиолдол батлагдсанаас анхны өвчтөн нас барж, түүнийг эмчилж байсан гурван эмнэлгийн ажилтан, гэр бүлийн гурван гишүүн болон шинээр илэрсэн нэг туслах ажилтан эмчилгээ хийлгэж байна.
Эрүүл мэндийн байгууллагууд халдвар тээгчтэй ойрын хавьтал болсон 130 орчим хүнийг тогтоосноос 128 иргэнийг тусгаарлан хянаж байна. Одоогоор бүх тохиолдол тусгаарлалтад байсан хүмүүсээс илэрсэн тул олон нийтийн дунд халдвар тархаагүй гэж албаныхан мэдэгдэв. Энэ удаагийн дэгдэлтийг үүсгэсэн “Бундибугио” омгийн эсрэг батлагдсан вакцин болон вирусийн эсрэг тусгай эмчилгээ байхгүй тул эмч нар шинж тэмдгийг намдаах дэмжих эмчилгээг голчлон үзүүлж байгаа аж.
Кенид гарсан уг халдвар нь тавдугаар сарын дундуур БНАКУ-д эхэлсэн томоохон дэгдэлт хил даван тархсан явдал юм. Конго улсад уг өвчний улмаас 9,400 гаруй хүн халдвар авч, 4,500 гаруй хүн нас баржээ. Түүнчлэн эбола вирус Төв Африкийн Бүгд Найрамдах Улстай хил залгаа орших Умард Убанги муж руу тэлж, нийт найман мужийг хамарсан нь бүс нутгийн хэмжээнд эрсдэлийг улам нэмэгдүүлж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.