Лондоны эмнэлгүүдийн цахим системийг хакердсан сэжигтнийг баривчилжээ
Герман болон Их Британийн хууль сахиулах байгууллагууд Лондоны эмнэлгүүдийн үйл ажиллагааг саатуулсан томоохон кибер халдлагыг ОХУ-ын иргэн, 28 настай Владимир К. гэгчтэй холбон шалгаж байна.
Германы хэвлэлүүдэд мэдээлснээр уг этгээдийг орос хэлээр харилцдаг "Qilin" хэмээх цахим гэмт хэргийн бүлэглэлийн гол гишүүн хэмээн үзэж байгаа юм. Германы мөрдөгчид түүний амралтын аяллын төлөвлөгөөг тагнаж тогтоосны дүнд тавдугаар сард Япон улсад буумагц нь баривчлуулсан бөгөөд аравдугаар сарын эхээр Германы талд шилжүүлэн өгчээ. Сэжигтнийг анх Германы ложистикийн компанийн системд нэвтрэн өгөгдлийг нь шифрлэж, 160 мянга орчим ам.долларын криптовалют сүрдүүлэн авсан хэрэгт буруутган эрэн сурвалжилж байсан түүхтэй.
Улмаар мөрдөгчид эрүүгийн хэргийн хүрээг өргөтгөж, 2024 оны зургаадугаар сарын 3-ны өдөр "Synnovis" байгууллагад хийсэн кибер дайралтыг уг хэрэгтэй нэгтгэн шалгаж эхэлжээ. Их Британийн нийслэл дэх эмнэлгүүд болон Германы "Synlab" компанийн хамтарсан оношилгооны "Synnovis" төв халдлагад өртсөнөөр өмнөд Лондоны "Гайс ба Сент Томас", "Кингс Коллеж" зэрэг томоохон эмнэлгүүдийн цусны шинжилгээ, сэлбэх үйл ажиллагаа ноцтой доголдсон билээ.
Гэмт этгээдүүдийн шаардсан барьцааны мөнгийг өгөхөөс татгалзсаны улмаас өвчтөнүүдийн хувийн мэдээлэл даркнетэд задарч, 10 мянга гаруй үзлэг болон мэс ажилбар хойшлогдоход хүрсэн юм.
Уг кибер дайралтын улмаас "Кингс Коллеж" эмнэлэгт хэвтэн эмчлүүлж байсан нэгэн өвчтөн нас барсан явдалд дотоод шалгалт хийсэн бөгөөд системийн саатлаас болж цусны шинжилгээний хариу удааширсан нь үхэлд хүргэх гол хүчин зүйл болсныг тогтоожээ. Энэ нь цахим халдлагын хор уршгаар өвчтөн нас барсан шууд холбоотой анхны тохиолдол болж байна. Иймээс Их Британийн цагдаагийн байгууллага цугларсан нотлох баримтуудад тулгуурлан сэжигтэнд хууль бусаар хүний аминд хүрсэн гэх зүйл ангиар ял тулгах боломжтой эсэхийг тусгайлан нягталж байна.
Хэрэв Британийн хууль сахиулагчид кибер халдлагын уршгаар хүний амь нас хохирсон үндэслэлээр яллах дүгнэлт үйлдвэл энэ нь цахим гэмт хэрэгтнүүдийг хүний аминд хүрсэн хэргээр шүүх дэлхийн анхны түүхэн жишиг болох юм. Мөрдөн шалгах ажиллагаа цаашид үргэлжлэх бөгөөд холбогдох албаныхан өвчтөнүүдийн амь насыг эрсдэлд оруулсан халдлагын бүх оролцогчдод зохих хариуцлага тооцохоор ажиллаж байна.
Эх сурвалж:
• soz6.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.