Флорида мужид загасчилж байсан иргэн матрын халдлагад өртөж амиа алджээ
АНУ-ын Флорида мужийн Уинтер Гарден хотын цэцэрлэгт хүрээлэнд 71 настай Стивен Хэмилтон баасан гаргийн 17:00 цагийн орчимд нуурын эрэг дээр загасчилж байхдаа матрын дайралтад өртөж, харамсалтайгаар амиа алджээ.
Гэрчүүдийн харж мэдээлснээр "Dr. Bradford Memorial Park" цэцэрлэгт хүрээлэнгийн цөөрмийн захад зогсож байсан эрэгтэй рүү матар гэнэт усны гүнээс цоройн гарч ирж дайран, ус руу чирч оруулсан байна. Халдлага үйлдсэн амьтан нь 3.5 метр урттай байсан бөгөөд Флоридагийн Загас, зэрлэг ан амьтныг хамгаалах комиссын (FWC) анчид түүнийг удалгүй устгажээ.
Уинтер Гарден хотын галын албаны дарга Хосе Гаинзагийн тайлбарласнаар, эрэн хайх ажиллагаа явагдаж байсан усанд өөр олон тооны матар байсан нь аврагчдын ажилд ихээхэн хүндрэл учруулсан байна. Аврах багийнхан шуурхай ажиллаж, халдлага гарснаас хойш ойролцоогоор хоёр цагийн дараа хохирогчийн цогцсыг уснаас олж гаргасан юм.
Уг хэргийг Уинтер Гарден хотын цагдаагийн газар болон ан амьтан хамгаалах байгууллагууд хамтран шалгаж эхэллээ. Цагдаагийн ахмад Майкл Мэйсон тус бүс нутагт, тэр дундаа Апопка нууртай холбогддог цөөрмүүдэд матар үзэгдэх нь ердийн зүйл болохыг анхааруулсан байна.
Цэцэрлэгт хүрээлэнд бүр "Матрын гүүр" нэртэй гарц хүртэл байдаг тул албаныхан иргэдийг зэрлэг амьтдаас сэрэмжилж, цэнгэг усны эргээс зай барихыг дахин санууллаа.
Энэхүү осол нь 2026 он гарснаас хойш Флорида мужид хүн матарт бариулж амиа алдсан хоёр дахь тохиолдол болж байна. Өнгөрсөн зургаадугаар сард Литтл Биг Экон байгалийн цогцолборт газарт 31 настай Бриттани Кларк ийм байдлаар амиа алдаж байв. Албан ёсны бүртгэлээс үзвэл тус мужид 1948 оноос хойш матрын дайралтаар нийт 34 хүн хорвоог орхижээ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.