Финляндад дөнгөж мэндэлсэн зургаан гөлөгний шууд дамжуулалтыг хамгийн их хүн үзжээ
Финляндын үндэсний олон нийтийн "Yle" телевизийн "Pentulive" нэвтрүүлгийн шинээр мэндэлсэн зургаан гөлөгний 24 цагийн тасралтгүй шууд дамжуулалт эхний зургаа хоногт 6.6 сая гаруй хандалт авч, тус улсад хамгийн өндөр үзэлттэй контентуудын нэг болжээ.
"Lagotto Romagnolo" үүлдрийн Хилкка нэртэй нохой аравдугаар сарын 10-нд төрж, хоёр эм, дөрвөн эр буюу нийт зургаан гөлөг төрүүлсэн юм байна.
Гөлөгнүүд мэндэлсний дараахан шууд дамжуулалтын камеруудыг ажиллуулж эхэлжээ. Одоогоор нэр өгөөгүй байгаа бяцхан амьтдыг арванхоёрдугаар сард шинэ эздэдээ очих хүртэл ойролцоогоор найман долоо хоногийн турш дэлгэцээр 24/7 харуулахаар төлөвлөсөн байна.
Энэхүү контент нь Норвеги улсад 2009 оноос анхлан дэлгэрсэн "slow TV" буюу удаан, аажим үйл явдалтай телевизийн формат бөгөөд "Pentulive" нэвтрүүлгийн хувьд зургаа дахь улирлын дугаар болж байна. Шинээр төрсөн гөлөгнүүд өдөрт 20 цаг хүртэл унтдаг тул дамжуулалтын дийлэнх хугацаанд тэдний унтах, эхийгээ хөхөх, хоорондоо ноололдох агшнууд гардаг.
Үзэгчид амьтдын өсөлт бойжилтын чухал үе шатууд болох нүдээ нээх, хөлд орох, анх удаа гадаа гарч тоглох үйл явцыг цаг тухайд нь шууд харах боломжтой юм.
Өнгөрсөн улиралд уг нэвтрүүлгийн цахим хуудас 6.5 сая хандалт авч, нийгмийн сүлжээнд 20 сая гаруй үзэлт цуглуулж байсан нь 5.66 саяд хүрэхгүй хүн амтай Финлянд улсын нийт иргэдийн тооноос давсан үзүүлэлт болж байв. Одоогийн байдлаар энэ жилийн дугаар өмнөх амжилтуудыг бүрэн эвдэх хандлагатай байна. Нар тусахгүй урт, хүйтэн өвөл эхэлж, Арктикийн цагариг орчимд агаарын хэм хасах 50 хэм хүртэл хүйтэрдэг финляндчуудын хувьд гөлөгнүүдийн эгдүүтэй, халуун дулаан амьдралыг шимтэн үзэх нь өвлийн бүүдгэр өдрүүдийн сэтгэл зүйн таатай эмчилгээ болж байгаа гэнэ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.