iPhone Duo нугардаг утасны дутагдалтай талуудыг шинжээчид нэрлэв
Apple компанийн анхны нугардаг ухаалаг утас болох iPhone Duo албан ёсоор худалдаанд гарах гэж байгаатай холбогдуулан технологийн салбарын анхны тойм үнэлгээнүүд нийтлэгдэж эхэллээ.
CNN агентлагийн тоймч Лиза Эдичико уг төхөөрөмжийг сүүлийн жилүүдэд Apple-аас гаргасан хамгийн сонирхолтой бүтээгдэхүүн гэж нэрлэсэн хэдий ч хэрэглээний явцад шийдвэрлэх шаардлагатай нэгэн томоохон асуудал байгааг сануулжээ. Шинэ төхөөрөмж нь АНУ-д 1,999 ам.долларын анхны үнэтэйгээр зах зээлд нийлүүлэгдэж буй бөгөөд энэ нь 14 инчийн MacBook Pro зөөврийн компьютерын өртөгтэй дүйцэж байгаа юм.
Уг загварын хамгийн том дутагдлаар одоогоор гуравдагч талын аппликейшнүүдийн зохицол хангалтгүй байгаа асуудал нэрлэгдэж байна. Учир нь зах зээл дээрх ихэнх программууд уламжлалт тэгш өнцөгт дэлгэцэнд зориулагдсан тул өргөн дэлгэц дээр зураг сунах, талбайг дутуу ашиглах зэрэг алдаанууд ажиглагдсан байна. Хэдийгээр Instagram, Slack болон Threads зэрэг алдартай платформууд шинэ дэлгэцэнд нийцүүлэн шинэчлэлт хийж эхэлсэн ч хөгжүүлэгчдийн зүгээс уг бүтцэд бүрэн дасан зохицох хүртэл хугацаа шаардагдахаар байна.
Техник хангамжийн хувьд уг төхөөрөмж нь 120Hz ProMotion дэмждэг, 3,000 нит хүртэл тодрох чадвартай 5.4 инчийн гадна OLED дэлгэц болон 7.6 инчийн нугардаг дотор дэлгэцтэй бүтээгджээ.
Дотор дэлгэц нь гэрлийн ойлтыг эрс бууруулдаг нано бүтэцтэй матт бүрхүүлээр хийгдсэн тул харах үед дэлгэцийн нугалаас бараг анзаарагддаггүй давуу талтай боловч хүрэх үед нугалаас мэдрэгддэг хэвээр байна.
Түүнчлэн уг ухаалаг утас нь Apple-ийн A20 Pro процессороор тоноглогдсон бөгөөд гар утасны цувралд анх удаа Apple Pencil дижитал үзгээр ажиллах боломжийг олгосон юм.
Гэсэн хэдий ч төхөөрөмжийн бүтэц хэд хэдэн буулт хийхэд хүргэжээ. Тухайлбал, 254 грамм жинтэй байгаа нь iPhone 18 Pro Max загвараас ч хүнд бөгөөд нэг гараар ашиглахад хялбар бус тул хэрэглэгчээс дасаж суралцахыг шаардаж байна. Мөн дотоод орон зайн хязгаарлалтын улмаас телефото дуран байхгүй, зөвхөн үндсэн болон өргөн өнцгийн хос камер суурилуулснаас гадна Face ID системийн оронд хажуугийн товчинд байрлах Touch ID мэдрэгчийг ашиглажээ. Батарейн туршилтаар интернэт хөтчийн ажиллагаанд 13 цаг 20 минут ажиллаж Galaxy Z Fold 8 төхөөрөмжийг давсан ч их ачааллын үед төхөөрөмж халж байгааг туршилтууд харуулсан байна.
Үнийн түвшний хувьд АНУ-ын зах зээлээс гадна Канадын зах зээлд 256GB загвар нь 2,999 канад доллар, харин дээд хэмжээтэй 2TB багтаамжтай хувилбар нь 4,799 канад долларт хүрсэн нь нэлээд өндөр өртөгт тооцогдож байна.
Дүгнэж үзвэл, шинжээчид iPhone Duo-ийн нугасны бүтэц, дээд зэргийн хийц болон далдлагдсан нугалаасыг өндрөөр үнэлж, технологийн салбарын чухал дэвшил хэмээн тодорхойлж байна. Гэвч хэт өндөр үнэ, хүнд жин болон программ хангамжийн дутуу шийдлүүдээс шалтгаалан жирийн хэрэглэгчдэд дараагийн үеийн загварыг хүлээхийг салбарынхан зөвлөж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.