Канад улс машингүй, гар утасны сүлжээгүй эзгүй аралдаа аялагчдыг хүлээн авч байна
Канадын Лабрадор мужийн зүүн өмнөд эрэг дэх Батл Харбор хэмээх эзгүй суурин нь авто зам, автомашин болон гар утасны сүлжээгүй орчинд аялагчдыг хүлээн авсаар байна.
Аяллын сэтгүүлч Женнифер Бэйний BBC Travel агентлагт нийтэлсэн сурвалжилгаас үзвэл, өнгөрсөн зуунуудад Лабрадорын давсалсан загасны гол төв гэгдэж байсан уг боомт өдгөө цахим хэрэглээнээс бүрэн ангид, өвөрмөц амралтын газар болон өөрчлөгджээ.
XVIII зуунаас XX зууны эхэн үе хүртэл Батл Харбор нь худалдаачид, нүүдлийн загасчид болон "ливьерс" хэмээн нэрлэгддэг байнгын оршин суугчдын төвлөрсөн, худалдаа наймаа цэцэглэсэн боомт байв. Гэвч атлантын сагамхай загасны нөөц шавхагдсаны улмаас 1992 онд загас агнуурт хориг тавьж, улмаар байнгын оршин суугчид нь нутгаа орхин явснаар хүн амьдардаггүй эзгүй хот болон хувирчээ.
Цагийн эрхээр балгас болон үлдэхээс сэргийлж, "Батл Харборын түүхийн сан" тус газрыг Үндэсний түүхийн дурсгалт дүүрэг болгон сэргээн засварласан байна.
Эвдэрч хуучирсан модон барилгууд, худалдаачдын хуучны орон сууц болон загасчдын байруудыг уламжлалт хэв маягаар нь сэргээж, аялагчид байрлан хоноглох боломжтой түүхэн өвийн цогцолбор болгон тохижуулжээ.
Өдгөө уг газарт зочид зөвхөн усан онгоцоор хүрэлцэн очдог бөгөөд дижитал орчноос тасарсан тайван уур амьсгалыг мэдрэх нөхцөлийг бүрдүүлсэн юм. Арлын удирдлагууд орчин үеийн дэд бүтцийг нэвтрүүлэлгүйгээр Лабрадорын далайн эргийн уламжлалт хоол хүнс, далайчдын аж байдал, нам гүм байгалийг анхны хэвээр нь хадгалан үлдээхийг зорьж байна.
Хуучны загасчны сууринг соёлын өвд түшиглэсэн аялал жуулчлалын бүс болгосон туршлага нь мартагдаж буй түүхийг хамгаалах үр дүнтэй арга болжээ. Холбоо харилцаа, автомашины түгжрэлээс ангид энэ газар нь завгүй амьдралын хэмнэлээс түр амсхийж, онгон байгальтай танилцахыг хүссэн жуулчдад түүхийн амьд гэрч болж байгаа аж.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.