ОХУ-д 230 гаруй тэрбум рублиэр долоон супер шорон барина
ОХУ-ын Холбооны ял шийтгэл гүйцэтгэх алба тус улсын долоон бүс нутагт төрөл бүрийн дэглэмийг нэгтгэсэн, нийт 20 мянга гаруй хүний багтаамжтай томоохон хорих цогцолбор барих төслийг хэрэгжүүлж эхэллээ. Уг бүтээн байгуулалтын нийт төсөв 230 гаруй тэрбум рублиэр хэмжигдэж байгаа бөгөөд бүх байгууламжийг 2035 он гэхэд бүрэн ашиглалтад оруулахаар төлөвлөжээ.
Төлөвлөгөө ёсоор шинэ цогцолборуудыг Бүгд Найрамдах Татарстан, Бүгд Найрамдах Буриад Улс, түүнчлэн Калуга, Астрахань, Тюмень мужууд болон Өвөр Байгалын хязгаар, Херсон мужид байгуулах юм. Эдгээрээс зургаа нь тус бүр 3000 хүний багтаамжтай байх бол Херсон муж дахь цогцолбор 2500 хүний суудалтай байхаар тооцогджээ. Нэгдсэн цогцолбор дотор урьдчилан хорих тусгаарлах байр, ерөнхий болон чанга, онцгой дэглэмтэй хорих ангиуд, шүүх танхим, байцаалтын өрөө, өмгөөлөгч болон ажиглагчдад зориулсан байруудыг нэг дор төвлөрүүлж байгаагаараа онцлогтой. Тухайлбал, Татарстаны цогцолборыг 2030 онд, Калуга мужийн байгууламжийг 2031 онд ашиглалтад оруулахаар товлосон байна.
ОХУ-д ийнхүү нэгдсэн байгууламжуудыг олноор байгуулах болсон гол шалтгаан нь одоогийн дэд бүтцийн хуучралттай шууд холбоотой гэнэ. Албаны мэдээллээр тус улсад хамгийн сүүлд 1984 онд шинэ хорих анги барьсан бөгөөд одоогийн барилгуудын дийлэнх нь элэгдэж, их засварын тогтмол зардал шаарддаг болсон байна.
Түүнчлэн мөрдөн байцаах байр, шүүх, хорих ангиудын хооронд яллагдагчдыг зөөвөрлөж байгааг халснаар харуул хамгаалалт, тээвэрлэлтийн зардлыг 25-30 хувиар хэмнэх боломж бүрдэнэ. Хотуудын төвд байрлах хуучин шоронгуудыг хотоос гадагш гаргаснаар чөлөөлөгдсөн үнэ цэнтэй газруудыг хот төлөвлөлтийн бүтээн байгуулалтад ашиглах зорилго ч мөн агуулагдаж байгаа гэнэ.
Шинэ цогцолборуудад хоригдогчдод зориулсан орчин үеийн ариун цэврийн стандартад нийцсэн амьдрах байр, эмчилгээ, урьдчилан сэргийлэх корпусууд болон хүүхдийн байрыг барьж байгуулах аж. Хяналт шалгалтын хувьд биометр таних систем, зан төлөвийг шинжлэх дүрс бичлэгийн ухаалаг хяналт, хөдөлгөөн мэдрэгч зэрэг цахимжуулсан хамгаалалтын орчин үеийн шийдлүүдийг нэвтрүүлнэ. Энэ нь “Снежинка” хорих ангид амжилттай туршигдсан технологийн туршлагад тулгуурлаж байгаа бөгөөд ажилтнуудын орон тооны хомстолыг нэгдсэн харуул хамгаалалтаар нөхөхөд тусална гэв.
Гэсэн хэдий ч хүний эрхийг хамгаалагчид болон өмгөөлөгчдийн зүгээс уг төсөлтэй холбоотой зарим эрсдэлийг сануулж байна. Олон мянган хоригдлыг нэг дор хэт төвлөрүүлснээр дарамт шахалт, хүчирхийлэл, авлига зэрэг тогтолцооны сөрөг үзэгдлүүд улам гаарах аюултайг тэд онцолжээ. Түүнчлэн шоронгийн цогцолборуудыг алслагдсан бүс рүү нүүлгэх нь ар гэрийнхэн болон өмгөөлөгчид очиж уулзахад тээврийн хүндрэл учруулж болзошгүй юм. Бүтээн байгуулалтын нийт зардал 230 гаруй тэрбум рубль хүрэх бөгөөд 2035 он хүртэл үргэлжлэх энэхүү шинэчлэл нь ОХУ-ын хорих тогтолцоог бүхэлд нь өөрчлөх өргөн цар хүрээтэй алхам болж байна.
Эх сурвалж:
• mka1.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.