Японы Засгийн газар Дорнод аймгийн хээрийн түймрийн хохирлыг нөхөн сэргээхэд дэмжлэг үзүүлнэ
Япон Улсын Засгийн газрын Ерөнхий нарийн бичгийн дарга Кихара Минорү өнөөдөр өглөө /2026.10.26/ хэвлэлийн бага хурал хийх үеэрээ Монгол Улсын зүүн бүсийн Дорнод аймгийн Нөмрөгийн дархан цаазат газарт гарсан хээрийн түймрийн асуудлыг хөндлөө. Тэрбээр уг гамшгийн улмаас учирсан хохирлыг Японы Засгийн газар ноцтой хүлээн авч үзэж буйг мэдэгдсэн байна.
Япон Улсын Засгийн газрын ЕНБД Кихара Минорү:
-Хээрийн түймрийн улмаас байгаль орчин болон орон нутагт учирсан их хэмжээний хохиролд гүнээ харамсаж байна. Монголын ард түмэнд чин сэтгэлийн эмгэнэл илэрхийлье. Гамшигт нэрвэгдсэн тусгай хамгаалалттай бүс нутгийг эргэн нөхөн сэргээхэд Японы Засгийн газрын зүгээс бүхий л талаар дэмжлэг туслалцаа үзүүлж, нягт хамтран ажиллахад бүрэн бэлэн байна.
Дорнод аймгийн тусгай хамгаалалттай газар нутагт Японы харилцаа холбооны томоохон "KDDI" корпорацын охин компани болох "Мобиком" (Mobicom Corp.)-ийн Японы удирдлагууд болон бусад албаны төлөөлөгчдийн цуваа зорчиж байх үед гал дэгдсэн талаар мэдээлэл авсан.
Одоогоор галын дэгдсэн нарийн шалтгааныг холбогдох хууль сахиулах болон онцгой байдлын мэргэжлийн байгууллагууд нарийвчлан шалгаж байна. Япон Улсын эрх баригчдын зүгээс шалгалтын явц болон эцсийн үр дүнг харгалзан үзэж, түймэрт өртсөн байгалийн нөөц бүхий газрыг сэргээн босгоход бодитой тусламж дэмжлэг үзүүлэх арга хэмжээнүүдийг үе шаттай хэрэгжүүлэхээр төлөвлөж байна гэв.
Эх сурвалж:
• itoim.mn
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.