Нас барсан иргэний байшинг өмчлөхөөр завдсан цагдаагийн алба хаагчийг баривчилжээ
АНУ-ын Флорида муж улсын Лодерхилл хотын цагдаагийн алба хаагч нас барсан иргэний хувийн мэдээллийг ашиглан орон сууцыг нь завшихыг завдсан хэргээр баривчлагдлаа.
Мөрдөн шалгах ажиллагааны дүнд 35 настай цагдаагийн ажилтан Брайан Луис Сгурос нь эзэнгүй үлдсэн үл хөдлөх хөрөнгийг хууль бусаар эзэмшиж, засвар хийн өөрийн нэр дээр шилжүүлэн авахаар санаархсан нь тогтоогдсон байна.
Хэрэг явдал 2022 оны долдугаар сарын 11-ний өдөр эхэлсэн бөгөөд хөршүүд нь 71 настай Деннис Ионис Вестийг хоёр долоо хоногийн турш харагдаагүй хэмээн мэдэгдсэний дагуу цагдаагийн бүрэлдэхүүн шалгалтаар очжээ. Цагдаа нар түгжээгүй байшинд нэвтрэхэд Вест зүрх судасны өвчний улмаас гэрийнхээ үүдэнд нас барсан байдалтай олдсон түүхтэй. Албаны энгэрийн камер болон баримт бичгүүдээс харахад Сгурос уг талийгаачтай өмнө нь ямар ч танил талын холбоогүй байжээ. Гэвч тэрээр хэрэг гарснаас хэдхэн долоо хоногийн дараа буюу наймдугаар сарын 1-ний өдрөөс эхлэн уг байшинг дур мэдэн эзэмшилдээ авсан байна.
Түүнчлэн Броуард тойргийн Шүүх эмнэлгийн газарт хандахдаа өөрийгөө Вестийн ойрын найз хэмээн худал мэдүүлж, талийгаачийг ямар ч төрөл садангүй хэмээн хэлсэн боловч бодит байдал дээр хууль ёсны өв залгамжлагчид байжээ.
Сгурос 2022 оны долдугаар сараас 2023 оны нэгдүгээр сарын хооронд албаны компьютероо урвуулан ашиглаж, хууль сахиулах байгууллагын мэдээллийн сангаас Вестийн хувийн мэдээллийг зөвшөөрөлгүйгээр долоон удаа шүүн авсан байна. Үүгээр зогсохгүй байшингийн ашиглалтын зардлыг талийгаачийн нэр дээр төлж, үл хөдлөх хөрөнгийн татварыг нь гүйцэтгэж байжээ. Тэрээр 2024 оны наймдугаар сард байшингийн цонх, хаалгыг солих 8000 ам.долларын барилгын зөвшөөрлийн хүсэлт гаргахдаа талийгаачийн жолооны үнэмлэхийг ашиглаж, гарын үсэг болон нотариатын тамгыг хуурамчаар үйлдсэн бөгөөд холбоо барих утсан дээр өөрийн дугаараа үлдээсэн байв.
Сгурос уг байшинг гэмт этгээдүүд болон орон гэргүй хүмүүсээс хамгаалах зорилгоор 214 мянга гаруй ам.доллароор бүрэн засварлаж, зах зээлийн үнэлгээг нь 500 мянган ам.долларт хүргэсэн хэмээн тайлбарлаж, 2025 оны хоёрдугаар сард тус үл хөдлөх хөрөнгийг эзэмших албан ёсны өргөдлөө гаргажээ.
Хууль бус үйлдлийг үл хөдлөх хөрөнгийн компани болон Вестийн хууль ёсны өв залгамжлагчид олж мэдэн холбогдох байгууллагад хандсанаар хэрэг илэрсэн юм.
Сгурос байшингийн түлхүүрийг өв залгамжлагчдад шилжүүлэн өгсөн боловч засварт зарцуулсан 200 мянга гаруй ам.доллароо нөхөн төлүүлэхээр тэдний эсрэг шүүхэд иргэний нэхэмжлэл гаргасан нь байдлыг улам хурцатгажээ. Лодерхилл хотын цагдаагийн газар 2026 оны тавдугаар сарын 27-нд дотоод шалгалт явуулж, хэргийн баримтыг Броуард тойргийн Шерифийн газар болон Үл хөдлөх хөрөнгийн гэмт хэрэгтэй тэмцэх албанд шилжүүлсэн байна.
Уг мөрдөн шалгалтын явцад Сгуросыг долоодугаар сард цалинтайгаар ажлаас нь түдгэлзүүлсэн бол 2026 оны аравдугаар сарын 20-ны өдөр Шерифийн албаныхан түүнийг албан ёсоор баривчилж, албан тушаалаас нь чөлөөлжээ. Аравдугаар сарын 21-ний өдөр шүүгч түүний батлан даалтын хэмжээг 25 мянган ам.доллароор тогтоосон байна.
Түүнийг албан үүргээ урвуулан ашигласан, нас барсан хүний хувийн мэдээллийг хууль бусаар ашигласан, албаны цахим мэдээллийн санд зөвшөөрөлгүй нэвтэрсэн зэрэг хэд хэдэн хүнд гэмт хэрэгт буруутган шалгаж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.