Төвөдийн хойд бүсэд 7.0 магнитудын хүчтэй газар хөдлөлт боллоо
БНХАУ-ын Төвөдийн хойд хэсэгт пүрэв гаргийн шөнө 7.0 магнитудын хүчтэй газар хөдлөлт бүртгэгдэж, наад зах нь 16 хүн амиа алдаж, 32 хүн гэмтэж бэртээд байна.
Орон нутгийн цагаар 22 цаг 33 минутын орчимд Нагчу бүсийн алслагдсан уулархаг нутагт болсон уг байгалийн гамшгийн дараа эрх баригчид онцгой байдлын хоёрдугаар түвшний бэлэн байдал зарлажээ.
Чичирхийллийн төв нь Нагчу хотоос зүүн хойд зүгт 183-191 километр, бүс нутгийн төв Лхас хотоос зүүн хойд зүгт ойролцоогоор 390-400 километрийн зайд оршдог. Хятадын Газар хөдлөлтийн сүлжээний төвөөс голомтын гүнийг 10 километр гэж тогтоосон бол АНУ-ын Геологийн алба 18 километрийн гүнд болсныг мэдээлсэн байна. Мөн голомтын таван километрийн радиуст газар нутгийн дундаж өндөр далайн түвшнээс дээш 4800 метрээс давж байгаа нь цаг агаар болон нөхцөл байдлыг улам хүндрүүлж байна.
Гамшгийн улмаас гэмтсэн 32 хүний 11-ийнх нь биеийн байдал хүнд байгаа бөгөөд 21 хүн хөнгөн гэмтэл авсныг баасан гаргийн өглөө албан ёсоор мэдээлэв. Түүнчлэн Нагчу хотын захиргааны мэдээлснээр хамгийн багадаа 339 орон сууц, байшин нурж сүйдсэн ба ойролцоох тосгонуудын авто замуудад болон барилга байгууламжид их хэмжээний цууралт үүсжээ.
Хятадын төв телевиз CCTV-ийн мэдээлснээр төмөр замын эрх бүхий байгууллагууд аюулгүй байдлын шалгалт хийх зорилгоор гамшигт өртсөн бүсээр дайран өнгөрөх галт тэрэгний хөдөлгөөнийг бүрэн зогсоосон байна.
Хятадын Газар хөдлөлтийн захиргаанаас яаралтай тусламжийн багийг илгээж, орон нутгийн гал сөнөөгчид, цагдаа, онцгой байдлын ажилтнууд эрэн хайх, аврах ажиллагааг эхлүүллээ. Аврагчид орох оронгүй болсон иргэдийг байрлуулах зорилгоор яаралтай тусламжийн майхнуудыг барьж байгуулах ажлыг зохион байгуулж байна.
Уг газар хөдлөлт нь тус бүс нутагт сүүлийн таван жилийн хугацаанд бүртгэгдсэн хамгийн хүчтэй гамшиг болсон төдийгүй 2024 оны нэгдүгээр сараас хойш БНХАУ-д тохиолдсон хамгийн өндөр магнитудтай чичирхийлэл болохыг төрийн хэвлэлүүд онцолжээ.
Эх сурвалж:
• kesq.com
• ndtv.com
• geo.tv
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.