Холбооны мөрдөх товчооны дарга асан Жэймс Комид гурав дахь удаагаа эрүүгийн хэрэг үүсгэлээ
АНУ-ын Хууль зүйн яам Холбооны мөрдөх товчооны захирал асан Жэймс Комид холбогдох эрүүгийн хэргийг Колумбиа тойргийн холбооны шүүхэд албан ёсоор нээлттэй болголоо.
Энэ нь ерөнхийлөгч Дональд Трампын засаг захиргаанаас түүний эсрэг эхлүүлж буй эрүүгийн гурав дахь хэрэг болж байгаа бөгөөд холбооны прокурорууд түүнийг Тагнуулын тухай хуулийн дагуу үндэсний батлан хамгаалахтай холбоотой нууц мэдээллийг хууль бусаар задруулсан болон үгсэн хуйвалдсан хоёр зүйл ангиар яллаж байна.
Хэрэгт дурдсанаар уг яллах үндэслэл нь 2016 оны аравдугаар сарын 5-нд "The New York Times" сонинд нийтлэгдсэн Yahoo компанийн цахим шуудангийн хяналт шалгалтын тухай мэдээлэл юм. Жэймс Коми Холбооны мөрдөх товчоог тэргүүлж байхдаа Ройтерс агентлагийн өмнө нийтэлсэн нийтлэлийг няцаах зорилгоор ажилтнууддаа сэтгүүлчидтэй холбогдон засгийн газрын нууц мэдээллийг задлах чиглэл өгсөн гэж прокурорууд буруутгажээ. Эдгээр хоёр зүйл ангиар түүнд хуулийн дагуу 20 хүртэлх жилийн хорих ял оноох боломжтой байна.
Уг хэргийг их тангарагтны шүүхээр хэлэлцүүлж яллах дүгнэлт гаргуулалгүйгээр, прокурорын мэдээлэл хэлбэрээр шүүхэд гаргасан нь хууль зүйн маргаан дагуулаад байгаа юм. Баримтыг хэрэг хөөн хэлэлцэх 10 жилийн хугацаа дуусахаас өмнө нууц байдлаар гаргасан бөгөөд шүүгч Комийн талын хүсэлтийг хүлээн авснаар аравдугаар сарын 26-ны даваа гаргийн өдөр нийтэд ил болгожээ. Хууль зүйн яам уг алхмыг хөөн хэлэлцэх хугацааг хуулийн хүрээнд сунгах түгээмэл арга барил гэж үзэж, мөрдөн шалгах ажиллагаа идэвхтэй үргэлжилж буйг мэдэгдсэн байна.
Жэймс Комийн өмгөөлөгч Патрик Фицжералд үйлчлүүлэгчээ хийгээгүй хэрэгт буруутгагдаж байгааг илэрхийлээд, 2016 оны мэдээлэл задарсан асуудлыг Трампын эхний бүрэн эрхийн үед хоёр удаа шалгаж, ял тулгах үндэслэлгүй гэж үзэж байсныг сануулжээ. Өмгөөллийн багаас арван жилийн хөөн хэлэлцэх хугацаа дууссан төдийгүй их тангарагтны шүүхийн шийдвэргүйгээр хэрэг үүсгэх боломжгүй хэмээн хэргийг хэрэгсэхгүй болгох хүсэлт гаргасан байна.
Харин Жэймс Коми өөрийн цахим мэдэгдэлдээ гэм буруугүй гэдгээ дахин бататгаж, Хууль зүйн яамыг улс төрийн өшөө авалтын зорилгоор урвуулан ашиглаж байна хэмээн шүүмжилжээ.
Өмнө нь 2025 оны есдүгээр сард Комид Сенатын хороонд худал мэдүүлэг өгсөн гэх үндэслэлээр хэрэг үүсгэсэн ч томилгооны зөрчлөөс шалтгаалан шүүх хэрэгсэхгүй болгож байсан түүхтэй. Түүнчлэн 2026 оны хавар түүнийг Ерөнхийлөгч рүү заналхийлсэн утгатай зураг цахим сүлжээнд нийтэлсэн гэх хэрэг одоо ч шийдэгдээгүй байгаа тул шинээр үүссэн тагнуулын хэргийн шүүх хуралдаан эрх зүйн томоохон тэмцэл болох төлөвтэй байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.