Санкт-Петербургт гэр бүлийнхээ хоёр хүнийг хөнөөсөн математикийн багшийг эрэн сурвалжилж байна
ОХУ-ын Санкт-Петербург хотын Красносельский дүүрэгт сургуулийн багш эрэгтэй хоёр настай хүү болон 58 настай эмэгтэйг онц хэрцгийгээр хөнөөж, хамтран амьдрагчийнхаа амь насыг бүрэлгэхийг завдсан онц ноцтой гэмт хэрэг гарчээ.
Хэрэг явдал "Солнечный город" орон сууцны хороололд шөнийн цагаар болсон байна. Цагдаагийн байгууллага хэргийн газарт шалгалт явуулахад багш мэргэжилтэй, 58 настай эмэгтэйн цогцсыг гэрээс нь илрүүлсэн бол 2024 онд төрсөн хоёр настай хүүгийн цогцсыг хөргөгчинд нуусан байдалтайгаар олжээ. Хүүгийн ээж болох 32 настай Анастасия гэртээ ирэх үед сэжигтэн түүн рүү алахаар дайрсан бөгөөд хохирогч эмэгтэй нэг давхрын цонхоор үсрэн гарч, тусламж дуудсаны ачаар амьд үлдсэн байна. Тэрбээр одоогоор хүнд гэмтэлтэйгээр эмнэлэгт эмчлүүлж байгаа аж.
Уг гэмт хэрэгт тус хотын нэгэн сургуульд математик, биеийн тамирын багшаар ажилладаг 40 настай Дмитрий Н. гэгчийг сэжиглэж байгааг хууль сахиулах байгууллагаас мэдээллээ.
Сэжигтэн нь хохирогч эмэгтэйн хамтран амьдрагч бөгөөд амиа алдсан бяцхан хүүгийн төрсөн эцэг юм. Хохирогчийн ойрын хүрээллийнхэн уг эрэгтэй урьд нь түрэмгий авир гаргадаг байсан тул эмэгтэй түүнээс болгоомжилдог байсныг онцолжээ.
Хэргийн газраас сэжигтний үлдээсэн гэрээслэл хэлбэрийн захидал олдсон байна. Тэрбээр захидалдаа ойр дотныхонтойгоо салах ёс гүйцэтгэж, мөнгөтэй банкны данснуудынхаа дугаарыг бичсэнээс гадна хамтран амьдрагчдаа гомдол мэдүүлсэн байжээ. Тодруулбал, амралтын өдрүүдэд өөрөө хүүхдээ хардаг атал эмэгтэй нь амардаг хэмээн буруутгаж, түүнчлэн хүүхдийнхээ эцэг мөн эсэхэд эргэлзэж байснаа дурдсан байна.
ОХУ-ын Мөрдөн шалгах хорооны Санкт-Петербург хот дахь Мөрдөн шалгах ерөнхий газраас бага насны хүүхэд болон хоёр хүний амь насыг бүрэлгэсэн, мөн алахыг завдсан үндэслэлээр эрүүгийн хэрэг үүсгэн шалгаж эхэллээ. Хэргийн газраас оргон зайлсан сэжигтнийг эрэн сурвалжлах ажиллагааг шуурхай зохион байгуулж байгаа гэнэ.
Эх сурвалж:
• ok.ru
• vertexaisearch.cloud.google.com
• life.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.