Хамгийн нууцлаг тэрбумтан Питер де Пютрон ил гарахаас өөр аргагүй болов

Санхүүгийн ертөнцөд хамгийн нууцлаг тэрбумтан хэмээн алдаршсан Их Британийн санхүүч Питер де Пютрон Формула-1 баг болон АНУ дахь мега төсөлтэй холбоотой шүүхийн маргааны улмаас олон нийтийн анхаарлын төвд орлоо.

The Financial Times сонины нийтэлсэн эрэн сурвалжлах мэдээллээр олон арван жилийн турш гэрэл зураг нь ил гараагүй, хувийн амьдрал нь бүрэн хаалттай байсан уг эрхмийн удирддаг бүтцүүд олон тэрбум ам.долларын хөрөнгө эргэлдүүлдэг боловч шүүхийн зарлан дуудах хуудсыг түүнд биечлэн гардуулж чадахгүй байна.

Питер де Пютрон үнэт цаасны алгоритмын арилжаагаар анх хөрөнгөө босгосон бөгөөд 1997 онд алдарт Жорж Соросын дэмжлэгтэйгээр анхны хөрөнгө оруулалтын сангаа байгуулж байжээ. Улмаар 2001 онд Лондон хотноо Gloucester Research буюу хожмын G-Research компанийг үүсгэн байгуулсан түүхтэй. Лондонд төвтэй уг байгууллага нь хувьцааны ханшийг урьдчилан таамаглах тоон судалгаа хийж, программ хангамжийн алгоритм боловсруулдаг. Тус фирм үнэт цаасыг шууд худалдаж авдаггүй, харин шинжилгээний өгөгдлийг татвар багатай бүсүүд дэх бүтцүүд рүүгээ шилжүүлдэг бөгөөд өрсөлдөгчдийнх нь тооцоолсноор түүнтэй холбоотой сан 10-12 тэрбум ам.долларын хөрөнгийг удирддаг ажээ. Үүнээс гадна тэрээр батлан хамгаалах технологи, авто спорт, дэд бүтцийн салбарт их хэмжээний хөрөнгө оруулсан байна.

Тэрбумтан де Пютрон олон жилийн турш олон нийтийн хараанаас бүрэн зайлсхийсэн хаалттай амьдралын хэв маягийг чанд сахиж ирсэн юм. Цахим орчинд түүний ганц ч гэрэл зураг байдаггүй төдийгүй эртний танилууд нь ч утасны дугаарыг нь мэддэггүй байна.

Уулзалт товлохдоо эхлэхээс хэдхэн минутын өмнө байршлыг нь зарлаж, гар утас зэрэг цахим төхөөрөмж авч ирэхийг хатуу хориглодог бөгөөд зарим арга хэмжээнд борооны цув, малгай, хар шилтэй хүрэлцэн ирж байжээ. Түүнчлэн G-Research компанид нууцлалын онцгой дэглэм үйлчилдэг тул ажилтнуудыг хэлтэс хооронд мэдээлэл солилцохыг хориглож, ажлаас гарсны дараа өрсөлдөгч компанид ажиллах эрхийг хатуу хязгаарладаг байна.

Гэвч Формула-1 уралдааны алдарт Williams багтай холбоотой маргаан түүнийг ил гарахад хүргэлээ. Де Пютрон тус багийг эзэмшдэг Dorilton Capital сангийн гол хөрөнгө оруулагч юм. Williams багийн маркетингийн албаны дарга асан Клаудиа Шварц уг сан болон Питер де Пютроны эсрэг биечлэн шүүхэд нэхэмжлэл гаргажээ. Хуулийн төлөөлөгчид тэрбумтны Жерси арал дахь харшид очиж мэдүүлэг авах зарлан дуудах хуудсыг хоёр ч удаа гардуулахаар очсон боловч түүнийг олж чадаагүйн улмаас бичиг баримтыг өөрт нь хүргэж чадаагүй байна.

Үүний зэрэгцээ түүний хөрөнгө оруулалт хийсэн АНУ-ын Өмнөд Каролина муж дахь томоохон бүтээн байгуулалт олны эсэргүүцэлтэй тулгарчээ. Тэрээр NorthMark компаниар дамжуулан 2.8 тэрбум ам.долларын өртөгтэй дата төв болон цахилгаан станцын төслийг санхүүжүүлж байгаа юм. Гэвч нутгийн оршин суугчид уг төслийг эсэргүүцэн шүүхэд хандаж, төслийн гүйцэтгэгчдийг байгаль орчин, дэд бүтцэд үзүүлэх бодит нөлөөллийн цар хүрээг нуун дарагдуулсан хэмээн буруутгаж байна.

Ийнхүү олон арван жилийн турш сүүдэрт нуугдаж, алгоритмын хүчээр үлэмж хөрөнгө босгосон санхүүч өдгөө томоохон төслүүдийн хуулийн маргааны улмаас хөшигний цаанаас ил гарахаас өөр аргагүй нөхцөл байдалд орж байна.

Эх сурвалж:

• glavny.tv

• expert.ru