Орост цэрэг татах үйл явц далд, албадлагын шинж чанартай болжээ
ОХУ-ын эрх баригчид цэрэг армиа өргөжүүлэхийн тулд иргэдийг хууран мэхлэх, дарамтлах болон далд хэлбэрээр хүчээр гэрээ байгуулах аргыг өргөнөөр ашиглаж байгааг CNN агентлагийн эрэн сурвалжлах нийтлэлд дэлгэжээ.
Тухайн улс 2022 оны есдүгээр сарын бүх нийтийн дайчилгааны дараа олон зуун мянган иргэн гадаад руу дүрвэж, нийгэмд эмх замбараагүй байдал үүссэний улмаас санхүүгийн өндөр урамшуулал амлах замаар гэрээт цэрэг элсүүлж ирсэн юм. Гэвч фронтын шугам дахь хохирол нэмэгдэж, сайн дураар алба хаах хүмүүсийн тоо буурсантай холбоотойгоор цэрэг таталт нь албадлагын болон хууран мэхлэх шинжтэй "мөлхөө дайчилгаа" болж хувирсныг хүний эрхийн хуульчид болон хохирогчдын ар гэрийнхэн мэдээлж байна.
Баримтаас дурдвал, тус улсын баруун бүсэд амьдардаг, батлан хамгаалахын үйлдвэрийн 50 гаруй насны ажилтныг орон сууцных нь гаднаас энгийн хувцастай хүмүүс машинд суулган авч явжээ. Судасны хүнд өвчний улмаас бараг явж чаддаггүй байсан түүнд ердийн мэдэгдэх хуудас хэмээн тайлбарлаж, цэргийн гэрээнд гарын үсэг зуруулсан байна. Удалгүй уг иргэнийг Луганск дахь цэргийн сургуулилалтын баазад аваачсан бөгөөд есдүгээр сарын сүүлчээр сураггүй алга болсныг ар гэрийнхэнд нь мэдэгджээ.
Мөн согтууруулах ундаа хэрэглэсэн үедээ хүчээр гэрээнд гарын үсэг зурсан өөр нэгэн эр сар хүрэхгүй хугацааны дараа сураггүй болсон бөгөөд цэргийн прокурорын байгууллага түүнийг сайн дураараа гэрээ байгуулсан хэмээн үзэж гомдлыг хэрэгсэхгүй болгосон байна.
Хуульч нэгний онцолсноор, цэрэг татагчид өр төлбөртэй, архаг өвчтэй эсвэл хамааралтай, эрхээ хамгаалах чадваргүй эмзэг бүлгийн иргэдийг зориуд онилж байгаа нь өдөр тутмын хэвийн үзэгдэл болжээ. Үүнээс гадна их дээд сургуулийн оюутнууд эрүүл мэндийн чөлөөлөлтөө шинэчлэх үеэр дарамт шахалттай тулгарч байгаа төдийгүй Пенза зэрэг бүс нутагт эрчүүдийг гудамжнаас шууд хүчээр авч явах тохиолдол гарч байгааг хараат бус хяналтын сувгууд баримтжуулсан байна.
Энэхүү арга нь 2022 оны 300 мянган хүнийг хамарсан гэнэтийн дайчилгаа шиг олон нийтийн эсэргүүцэл үүсгэхгүйгээр цэргийн бие бүрэлдэхүүнийг чимээгүй нөхөх зорилготой гэж шинжээчид үзэж байна. Нөгөө талд тус улсын албан ёсны байгууллагууд шинээр дайчилгаа зарлах төлөвлөгөө байхгүй бөгөөд бүх гэрээт цэргүүд сайн дурын үндсэн дээр алба хааж байгаа хэмээн няцаасаар байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.