Эрлин Хааланд ДАШТ-д 317 мянган долларын цүнхний цуглуулгаараа онцгойрч байна

"Хөлбөмбөгийн ДАШТ-2026"-д Норвегийн шигшээ багийг сүүлийн гурван арван жилд анх удаа удирдан оролцож, дөрвөн гоол оруулаад буй довтлогч Эрлин Хааланд талбай дээр төдийгүй талбайн гадна ч олны анхаарлыг татаж байна.

Тэрээр тэмцээний үеэр 317 мянга гаруй ам.доллароор үнэлэгдэх ховорт тооцогддог "Hermès" брэндийн цүнхний цуглуулгаа дэлгэж, энэ удаагийн ДАШТ-ий загварын гол дүр төрх болон хувирчээ.

Загварын стилист бөгөөд тиктокчин Жек Савуа Хааландын аяллын цүнхнүүдийг нарийвчлан тайлбарласан бичлэг нийтэлсэн нь богино хугацаанд 10 сая гаруй хандалт авч, цахим орчинд шуугиан тариад байна.

Загварын шинжээчдийн тэмдэглэснээр, хүмүүс түүний цүнхнүүдийг алдарт "Birkin" загвартай андуурдаг ч үнэндээ ихэнх нь "Haut à Courroies" (HAC) загварын цүнхнүүд ажээ. Уг загвар нь анх морины тоног төхөөрөмж тээвэрлэх зориулалттай, өндөр бөгөөд нарийн хэлбэртэй бүтээгдсэн тул 195 см өндөртэй тамирчны бие галбирт төгс зохицож байгааг мэргэжилтнүүд онцолсон байна.

Норвеги довтлогчийн цуглуулгад хамгийн багадаа долоон өвөрмөц загварын цүнх багтдаг бөгөөд тэдгээрээс хамгийн үнэтэй нь 69,500 ам.долларын үнэ бүхий хар өнгийн олон халаастай "HAC 50" юм. Үүнээс гадна 50,000 ам.долларын үнэтэй "Evercalf Toile Cargo HAC 40" болон 45,500 ам.доллароор үнэлэгдэх онцгой загвар болох "Endless Road HAC 50" багтжээ.

Хааланд Хойд Каролина мужид онгоцноос буухдаа уулархаг замын дүрсийг арьсан хээгээр урласан "Endless Road" цүнхийг барьж явсан нь гэрэл зурагчдын дуранд өртсөн байна. Түүнчлэн түүний цуглуулгад хөвдөн ногоон өнгийн даавуун HAC болон хар, улбар шар өнгийн шатарчилсан хээтэй HAC цүнхнүүд багтдаг бөгөөд тэрээр өөрийн аварга том "HAC 50" цүнхэн дотроо найз бүсгүй Изабел Хаугсенг Йохансений жижиг хэмжээтэй "Birkin 25" цүнхийг чамин байдлаар хийж авч явсан нь загварын ертөнцийнхний анхаарлыг ихэд татжээ.

Тансаг зэрэглэлийн цүнхээр гангарах хандлага зөвхөн Хааландаар хязгаарлагдсангүй, 2026 оны ДАШТ нь элит спорт болон өндөр зэрэглэлийн загварын ертөнц хэрхэн нэгдэж байгааг харуулж байна.

Тухайлбал, Аргентины супер од Лионель Месси "Hermès HAC 40" карго загварын цүнхтэй аялж байгаа бол Нидерландын хамгаалагч Виржил ван Дейк саарал өнгийн арьсан "Hermès HAC" цүнхийг сонгожээ. Францын шигшээ багийн тоглогчдын хувьд Майкл Олисе Бостоны Логан олон улсын нисэх онгоцны буудалд хар өнгийн том "Hermès Birkin 40" цүнхтэй ирсэн бол Ибрахима Конате ховорт тооцогддог "Hermès Birkin Cargo" цүнхээр гоёсон байна.

Дэлхийн шилдэг хөлбөмбөгчид өөрсдийн хувийн хэв маягийг илэрхийлэхийн тулд ховор, аварга том хэмжээтэй брэндийн аяллын цүнхнүүдийг сонгож байгаа нь цаашид ч спортын ертөнц дэх загварын чиг хандлагыг тодорхойлох төлөвтэй байна.

Эх сурвалж:

• timesofindia.indiatimes.com

• 1news.az

• purseblog.com

• kesq.com

• highsnobiety.com