Тупак Шакурын амийг хөнөөсөн хэргийн зохион байгуулагчид 40 жилийн хорих ял оноолоо

АНУ-ын Лас Вегас хотын шүүхээс 1996 оны есдүгээр сард алдарт рэппер Тупак Шакурын амийг бүрэлгэсэн хэргийг зохион байгуулсан Дуэйн “Кеффи Ди” Дэвист 40 жилийн хорих ял оноов. 

Невада муж улсын Наймдугаар тойргийн шүүхийн шүүгч Карли Кирни түүнд нэгдүгээр зэргийн хүн амины хэрэг үйлдсэнд 20 жил, галт зэвсэг хэрэглэсэнд нь нэмж 20 жилийн хорих ялыг дараалуулан эдлүүлэх шийдвэр гаргажээ. Өдгөө 63 настай Дэвис нь домогт дуучны аминд хүрсэн хэрэгт албан ёсоор яллагдан шийтгүүлж буй цорын ганц этгээд болж байна.

Шүүгч Карли Кирни ялын дээд хэмжээг зарлахдаа, "Хэн ч бусдын амь нас, гэр бүл, ирээдүйг бүхэлд нь булаачихаад зүгээр өнгөрч болохгүй"-г онцолсон байна.

Тэрбээр Тупак Шакурын үхлийг дэлхий ертөнц болон Лас Вегас хот хэзээ ч мартаагүйг сануулав.

Прокурорын орлогч Марк ДиЖиакомогийн үзэж буйгаар урьд өмнө нь найман удаа ял шийтгүүлж байсан Дэвис насаараа шоронд хоригдохоор болсныг цохон тэмдэглэжээ. Түүнчлэн гэмт этгээд уг хэргийн талаар ном бичиж, ярилцлага өгөх замаар ашиг хонжоо олохыг эрмэлзэж байсан нь ялыг хүндрүүлэх үндэслэл болсон байна. 

Шүүх хуралд талийгаачийн ар гэрийнхэн сэтгэл өвтгөсөн мэдэгдэл хийж, гуч шахам жил үргэлжилсэн шаналлаа хуваалцжээ. Шакурын охин дүү Секйива "Сет" Шакур бараг гучин жилийн турш ахынхаа халамж, хамгаалалтгүй амьдарснаа нулимс дуслуулан өгүүлээд, хүний амь үнэ цэнтэй л юм бол түүний ахын амь нас ч асар их үнэ цэнтэй байсныг хэлсэн юм. Мөн талийгаачийн ах Морис гэмт этгээдэд хуулийн дээд хэмжээгээр ял оноохыг шаардаж, Тупакт үр хүүхэдтэй болох, амьдралаа үргэлжлүүлэх ямар ч боломж олгоогүй харгис хэрцгий аллага байсныг шүүхэд санууллаа.

Энэхүү хэрэг 1996 оны есдүгээр сарын 7-ны үдэш гарсан бөгөөд 25 настай Тупак Шакур "Death Row Records" компанийг үүсгэн байгуулагч Марион “Шуг” Найтын жолоодож явсан хар өнгийн BMW автомашинд сууж байхдаа халдлагад өртжээ. Тэдний хажууд цагаан өнгийн Cadillac машин ирж зогсон, түүн дотроос гал нээснээр Шакур олон тооны суманд өртөж, зургаан өдрийн дараа шархаа даалгүй нас барсан түүхтэй.

Мөрдөн байцаалтын дүнгээр Дэвис гох дарсан этгээд биш боловч гэмт бүлэглэлийн толгойлогчийн хувиар .40 калибрын гар бууг олж өгөн, халдлагыг гардан зохион байгуулсан нь нотлогдсон юм.

Хэдэн арван жилийн турш мухардалд орсон хэргийн нууцыг Дэвис өөрөө дэлгэсэн гэж хэлж болно. Тэрбээр баримтат кино, хэвлэлийн ярилцлагууд болон 2019 онд гаргасан дурсамж номондоо хэрэгт оролцсон тухайгаа ил тод өгүүлсэн нь хуулийн байгууллагуудад мөрдөн шалгалтыг сэргээх үндэслэл болжээ. Шүүхийн шийдвэр гарсны дараа Дэвис болон түүний өмгөөлөгч Майкл Санфт нар хэргийг шүүхэд шилжүүлэх хугацааг хэт удаашруулсан гэх үндэслэлээр давж заалдахаа мэдэгдээд байна.

Эх сурвалж:

• vertexaisearch.cloud.google.com

• pbs.org

• latimes.com

• facebook.com

• stereogum.com