Гватемалд нас барсан хэмээн оршуулж байсан охин авсандаа сэргэж, өндийн суужээ
Гватемал улсын Эль-Хокоте тосгонд нас барсан хэмээн тооцогдож, авсанд хийн оршуулах гэж байсан 15 настай охин оршуулах ёслолын үеэр гэнэт сэргэсэн ер бусын явдал гарчээ.
Сургуулийн сурагч Юлейди Искотояк гэх өсвөр насны охин ухаан алдсанаас хойш найман цагийн дараа хайрцаг дотроо хөдөлж, нүдээ нээн өндийж суусан байна.
Энэхүү хачирхалтай тохиолдол 2026 оны аравдугаар сарын 10-11-ний өдрүүдэд эхэлжээ. Охины зүрхээр гэнэт хүчтэй хатгуулан, цээж нь хүндэрсний улмаас ухаан алдаж унасан байна. Орон нутгийн пастор ажилтай түүний эцэг Абрахам Искотояк охиноо яаралтай эмнэлэгт хүргэхээр машиндаа суулган хөдөлсөн боловч зам зуур судасны цохилт болон амьсгал нь мэдрэгдэхгүй болжээ.
Эцэг нь охиноо амьсгал хураасан гэж үзэн эмнэлэг орж мэргэжлийн эмчид үзүүлэлгүй, замдаа авс худалдан авч гэртээ эргэн ирсэн байна. Үүний улмаас нас барсныг батлах албан ёсны эмнэлгийн магадлагаа хийгдээгүй аж.
Гэртээ салах ёс гүйцэтгэж байх явцад охины ээж Лесвия Риос авсны шилэн цонхоор хүүхэд нь хөдөлж байхыг санамсаргүй харжээ. Хамаатан садангууд нь авсны тагийг нээхэд Юлейди нүдээ нээж, улмаар цочролд орсон хүмүүсийн өмнө өөрөө өндийж суусан байна. Тэнд байсан хүмүүс охиныг авснаас гаргахад тусалсан бөгөөд дахин амилсан мэт уг агшны дүрс бичлэг олон нийтийн сүлжээгээр хурдацтай тархаад байна.
Одоогоор охин гэртээ асруулж байгаа ч бие нь сульдсан, гар нь үл мэдэг салганаж байгаа гэнэ. Эмч нар түүний хэдэн цагийн турш гүн ухаан алдсан шалтгааныг тодруулахаар нарийн шинжилгээ хийхээр төлөвлөжээ. Мэргэжилтнүүд гүн шок, летарги нойр, эсвэл клиник үхэлд орсон байж болзошгүй гэж үзэж байгаа ч эцсийн дүгнэлт хараахан гараагүй байна.
Эх сурвалж:
• oxu.az
• 360.ru
• life.ru
Сэтгэгдэл (1)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.