АНУ-д цагаачлалын албаны машин зугтсан иргэнийг дайрчээ
АНУ-ын Техас мужийн Хьюстон хотод Холбооны цагаачлал, гаалийн хяналтын албаны (ICE) ажилтнууд ажиллагаа явуулах үеэрээ зугтса 48 настай цагаач иргэнийг автомашинаараа мөргөж, хүнд бэртээсэн хэрэг гарлаа.
Бямба гарагт гарсан уг хэрэг гарсан бөгөөд автомашинд дайруулсан Мексик улсын иргэн Мигель Парра-Эрнандес хоёр хөлөө хугалж, эмнэлэгт хүргэгдсэн байна.
Хэргийн нөхцөл байдлыг тодруулбал, холбооны ажилтнууд цагаан өнгийн "Chevrolet" маркийн пикап загварын автомашиныг шалгахаар зогсоохыг завдах үед уг тэрэгнээс хоёр эрэгтэй буун явганаар зугтсан байна. Энэ үед цагаачлалын албаны таних тэмдэггүй, хар өнгийн жийп автомашин тэдний араас зогсоол дундуур хөөж, улмаар Мигель Парра-Эрнандесийг мөргөжээ. Хяналтын камерын бичлэгт хүч нэмэн хурдалсан жийп автомашин явган хүний зүг чиглэн явж, улмаар түүнийг газарт унагаж буй байдал бичигдсэн байна.
Цагаачлалын албаны зүгээс гаргасан тайлбартаа зугтаж явсан иргэн өөрөө автомашины урдуур гүйж орсон хэмээн мэдэгдэж, ослын дараа ажилтнууд эмнэлгийн анхан шатны тусламж шуурхай үзүүлсэн гэж дурджээ.
Харин хохирогчийн өмгөөлөгч Ким Бруно уг тайлбарыг үгүйсгэж, түүний үйлчлүүлэгч нь АНУ-д 34 жил ажиллаж амьдарсан, ямар нэгэн гэмт хэрэгт холбогдоогүй, хууль сахиулах байгууллагад өмнө нь саатуулагдаж байгаагүйг онцолсон байна. Мөн ар гэрийнхэн болон орон нутгийн иргэдийн төлөөлөл явган хүнийг автомашинаар хөөж мөргөсөн явдалд шударга ёс тогтоохыг шаардаж эхэлжээ.
Уг ажиллагааны үндсэн бай нь Мигель Парра-Эрнандес биш байсныг албаныхан баталсан юм. Цагаачлалын албаны гол зорилтот этгээд нь хамт явж байгаад бутан дундуур нуугдан зугтаж амжсан Хосе Мендоса-Сервантес гэгч байсан бөгөөд түүнийг эрэн сурвалжлах ажилд олон нийтээс тусламж хүссэн байна. Хоёр хөлөө хугалж, хагалгаанд орохоор хүлээгдэж буй Парра-Эрнандес одоогоор холбооны цагдаагийн хяналт дор эмнэлэгт хэвтэн эмчлүүлж байгаа ажээ.
Холбооны ажилтнууд явган хүнийг автомашинаар мөшгиж осол гаргасан нөхцөл байдлыг Харрис гүнлэгийн Шерифийн газар шалгаж эхэлсэн бөгөөд мөрдөн байцаалтын үр дүнд хүч хэрэглэх журам зөрчигдсөн эсэхийг эцэслэн тогтоох юм.
Эх сурвалж:
•
• kvia.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.