ОХУ-д Японы сэтгүүлчийг тагнуулын хэрэгт сэжиглэн баривчилжээ
Оросын Холбооны Аюулгүй байдлын алба Японы өдөр тутмын томоохон хэвлэл "Хоккайдо Симбун" сонины итгэмжлэгдсэн сурвалжлагч, 34 настай Юки Имайг Сахалин мужид тагнуулын хэргээр баривчилснаа албан ёсоор мэдээллээ.
Сэтгүүлчийг тус улсын хилээр гарахын өмнөхөн саатуулан Москва хотод хүргэсэн бөгөөд Лефортово дүүргийн шүүхээс түүнийг урьдчилан хорих төвд хоёр сарын хугацаатай саатуулах шийдвэр гаргасан байна.
Хуулийн байгууллагаас ОХУ-ын Эрүүгийн хуулийн 276 дугаар зүйл буюу 20 хүртэлх жилийн хорих ялтай тагнуулын зүйл ангиар эрүүгийн хэрэг үүсгэсэн байна. Сөрөг тагнуулын албаны мэдэгдэлд Юки Имайг Японы тусгай албаны даалгавраар Курилийн арлуудын батлан хамгаалах чадавх, тэр дундаа Украины эсрэг байлдааны ажиллагаанд дайчлагдсан болон сайн дураар оролцож буй орон нутгийн иргэдийн тоо баримтыг цуглуулсан хэмээн буруутгажээ. Мөн түүхэн баримтууд, тухайлбал Дэлхийн хоёрдугаар дайны үед Зөвлөлт Холбоот Улсын эсрэг биологийн дайн явуулахаар бэлтгэж байсан Японы төлөвлөгөөтэй холбоотой материалуудыг авч явсан гэх тайлбарыг төрийн хэвлэлүүд нь өгч байна.
Орос хэлтэй сэтгүүлч Юки Имай нь тус улсад зун очсоноосоо хойш Алс Дорнодын бүс нутгийн Владивосток, Находка, Сахалин зэрэг газруудаар ажиллаж байжээ.
Тэрээр Находка хотод байхдаа Хүүхдийн бүтээлийн ордон болон Дэлхийн хоёрдугаар дайны үеийн Японы дайны олзлогдогсдын түүхт байршлуудаар зочилж, нутгийн иргэдийн өдөр тутмын амьдрал, Зөвлөлт-Японы дайны түүх болон хоёр орны харилцааны ирээдүйн сэдвээр нийтлэл бэлтгэхээр ажиллаж байсан аж.
Энэхүү баривчилгаа нь Черногори улсад Оросын цэргийн чиглэлийн “Рыбарь” сувгийг үндэслэгч Михаил Звинчук баривчлагдсаны дараахан өрнөсөн нь олон улсын шинжээчдийн анхаарлыг татаж байна. ОХУ-ын Аюулгүйн зөвлөлийн дэд дарга Дмитрий Медведев баривчлагдсан өөрийн талын хүмүүсийг эргүүлэн авчрахын тулд барууны иргэдээр “солилцооны сан”-гаа бүрдүүлэх шаардлагатай гэж мэдэгдэж байсан бөгөөд сэтгүүлчийн хэргийг энэхүү бодлогын үргэлжлэл гэж зарим ажиглагчид үзэж буй юм.
ОХУ-ын Гадаад хэргийн яамны албан ёсны төлөөлөгч Мария Захарова мэдэгдэл хийхдээ, Токиогийн эрх баригчид хэвлэлийн төлөөлөгчдийг ашиглан аюулгүй байдалд сөргөөр нөлөөлөх мэдээлэл цуглуулж байгаад харамсаж байгаагаа илэрхийлээд, аливаа дайсагнасан алхмуудаа зогсоохыг шаарджээ. Хоёр улсын харилцаа ээдрээтэй байгаа энэ үед Японы сэтгүүлчид тагнуулын хэрэг тулгасан явдал дипломат харилцааг улам бүр хурцатгах төлөвтэй байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.