Сурагч нүдний торлогоор аутизм болон анхаарал дутмагшлыг илрүүлэх хиймэл оюун бүтээжээ
АНУ-ын Нью-Жерси муж дахь “Bergen County Academies” сургуулийн 17 настай сурагч Эдвард Канг хүний нүдний торлог бүрхэвчийн зургийг шинжлэн, аутизм болон анхаарал дутмагшил, хэт хөдөлгөөнтөх эмгэг (ADHD)-ийг эрт илрүүлэх чадвартай хиймэл оюун ухааны систем зохион бүтээжээ.
“RetinaMind” нэртэй уг систем нь ураг бүрэлдэх явцад нүдний торлог бүрхэвч тархитай ижил эд эсээс үүсэж хөгждөг гэсэн биологийн зүй тогтолд тулгуурлажээ. Мэдрэлийн тогтолцооны өвөрмөц ялгаа болон хөгжлийн онцлог нь нүдний торлогийн бичил бүтцэд тодорхой хэмжээгээр тусгалаа олдог байна. Эдвард Кангийн хөгжүүлсэн гүн сургалтын загвар нь хүний нүдээр ялгаж харах боломжгүй судасны нарийн бүтэц, өөрчлөлтийг нарийвчлан шинжлэх зарчмаар ажилладаг юм.
Хэдэн мянган өгөгдөл, эмнэлгийн зураглал дээр туршилт явуулахад уг загвар аутизм, ADHD болон мэдрэлийн хэвийн хөгжилтэй хүмүүсийн өгөгдлийг ойролцоогоор 89 хувийн нарийвчлалтайгаар ялган оношилжээ. Үүнээс гадна зохион бүтээгч хүү аутизмын эсийн загварыг бие даан гаргаж, торлог бүрхэвчийн өөрчлөлтөд нөлөөлдөг байж болзошгүй арав гаруй генийн үйл ажиллагааг давхар судалсан байна.
Шинжлэх ухааны салбарт томоохон дэвшил авчирсан уг бүтээлээрээ Эдвард Канг АНУ-ын ахлах ангийн сурагчдын дундах нэр хүндтэй “2026 Regeneron Science Talent Search” уралдаанд хоёрдугаар байр эзэлж, 175,000 ам.долларын тэтгэлэг хүртсэн юм.
Одоогоор “RetinaMind” систем нь туршилт, судалгааны шатандаа яваа бөгөөд эмнэлзүйн албан ёсны оношилгооны төхөөрөмжийг бүрэн орлохгүй, урьдчилан тандах зориулалттай ажээ. Хүүхдийн зан үйлийг урт хугацаанд ажиглан оношилдог уламжлалт арга барилыг хөнгөвчилж, эхний шатны сэжигтэй тохиолдлуудыг эрт илрүүлэхэд уг технологи эмч нарт бодит тусламж болно гэж судлаачид найдаж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.