Чилийн Эль Теньенте зэсийн уурхайд хөрс нурсны улмаас хоёр хүн амиа алджээ
Чилийн төрийн өмчит «Коделко» компанийн харьяа Эль Теньенте зэсийн уурхайд хөрс, цасны нуралт үүссэний улмаас хоёр ажилтан амиа алдаж, нэг хүн гэмтсэн байна. Ослын хэрэг явдал 2026 оны аравдугаар сарын 11-ний ням гаргийн 14:00 цагийн орчимд нийслэл Сантьяго хотоос зүүн өмнө зүгт 75 километрийн зайд, Андын нуруунд орших уурхайн өмнөд ил талбайд гарчээ.
Осол болох үед туслан гүйцэтгэгч «Aura Ingeniería SA» болон «San Lorenzo» компанийн гурван ажилтан талбайд хяналт шалгалтын ажил хийж байсан юм. Аврах багийнхан нэг ажилтныг цаг алдалгүй эсэн мэнд гарган авч, эмнэлгийн байгууллагад хүргэсэн бол нуралтад дарагдан сураггүй болоод байсан 34 болон 53 настай хоёр ажилтны цогцсыг эрэн хайх ажиллагааны явцад олж тогтоожээ.
Чилийн уулархаг бүс нутгаар сүүлийн өдрүүдэд орсон их хэмжээний аадар бороо, цаг агаарын эрс тэс уур амьсгалын улмаас уулын энгэрт хөрс, цас, шаврын нуралт үүссэн гэж урьдчилсан байдлаар мэдээлсэн байна. Цаг агаарын таагүй байдлын улмаас тус ил уурхайн үндсэн олборлолтыг өмнө нь түр зогсоосон байсан бөгөөд ажилтнууд нөхцөл байдлыг шалгахаар явж байх үедээ уг осолд өртжээ.
Ослын дараа Чилийн уул уурхайн хяналт, зохицуулах байгууллага болон «Коделко» компанийн зүгээс уурхайн өмнөд ил хэсгийн үйл ажиллагааг хэсэгчлэн зогсоосон байна. Гэсэн хэдий ч Эль Теньенте уурхайн нийт үйлдвэрлэлийн дийлэнх буюу 90 гаруй хувийг гүний уурхай бүрдүүлдэг бөгөөд осол гарсан ил уурхай нь нийт гарцын 10 хүрэхгүй хувийг эзэлдэг тул гүний уурхай болон баяжуулах үйлдвэрийн үйл ажиллагаа хэвийн үргэлжилж байна.
Одоогоор Чилийн Мөрдөн шалгах цагдаагийн байгууллага болон Улсын прокурорын газар ослын газар дээр ажиллаж, байгалийн хүчин зүйлээс гадна аюулгүй ажиллагааны дүрэм журам зөрчигдсөн эсэхийг нарийвчлан шалгаж эхэлжээ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.