Хойд Солонгосын пуужингийн анги ОХУ-ын баруун хэсэгт байршиж эхэллээ
Украины цэргийн тагнуулын албанаас ОХУ-ын баруун хэсэгт Хойд Солонгосын пуужингийн анги нэгтгэл байршиж, Украины эсрэг дайнд дэмжлэг үзүүлэхээр бэлтгэж байгаа талаарх мэдээллийг олон нийтэд ил болголоо.
Хойд Солонгос улс ОХУ-д шинээр 40 ширхэг "KN-23" болон "KN-24" загварын ойрын тусгалтай баллистик пуужин нийлүүлсэн бөгөөд үүнийг дагалдуулан цэргийн болон техникийн мэргэжилтнүүдээ илгээсэн байна. Энэхүү алхам нь хоёр улсын цэргийн хамтын ажиллагаа шинэ шатанд гарсныг илтгэж байгаа бөгөөд өмнө нь буюу 2023 оны сүүлээс 2025 оны наймдугаар сар хүртэлх хугацаанд Хойд Солонгосоос ОХУ-д 150 орчим баллистик пуужин нийлүүлээд байсан юм.
Бүрэлдэхүүндээ 90 орчим Хойд Солонгосын цэргийн албан хаагчийг багтаасан тус пуужингийн анги одоогоор Украины хилээс 95 милийн зайд орших ОХУ-ын баруун бүсийн Воронеж мужид байршиж байна. Цэргийн ложистикийн гол зангилаа болсон тус мужид ирсэн Хойд Солонгосын цэргүүдийг ОХУ-ын Зэвсэгт хүчний 112 дугаар пуужингийн бригадын бүрэлдэхүүнд нэгтгэхээр төлөвлөжээ. ОХУ-ын зүгээс тус ангийг нийт зургаан харвах төхөөрөмж, 120 хүртэлх баллистик пуужингаар зэвсэглэх зорилго тавьжээ.
Долоодугаар сарын 30-ны өдөр шинээр нийлүүлсэн пуужингуудын нэг болох "KN-23" пуужингаар Украины Днепропетровск мужийн Радушне сууринг харважээ. Тус цохилтын улмаас зургаан хүн, түүний дотор гурван хүүхэд амь үрэгдсэн харамсалтай үйл явдал болсон юм.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.