Латвийн агаарын хилд үл мэдэгдэх дрон нэвтэрч НАТО-гийн сөнөөгчдийг хөөргөжээ
Латви улсын Орос болон Беларусьтай залгаа зүүн хилийн агаарын орон зайд үл мэдэгдэх нисдэг биет нэвтэрсний улмаас агаарын түгшүүр зарлаж, НАТО-гийн сөнөөгч онгоцуудыг яаралтай бэлэн байдалд оруулан агаарт хөөргөжээ.
Балтийн тэнгисийн бүс нутагт агаарын цагдаагийн үүрэг гүйцэтгэж буй НАТО-гийн сөнөөгч онгоцууд үүссэн аюул заналхийллийн эсрэг шуурхай хариу арга хэмжээ авсан бөгөөд агаарын аюулын түгшүүр 30 минутаас нэг цаг хүрэхгүй хугацаанд үргэлжилсний эцэст цуцлагдсан байна.
Уг үйл явдалтай холбогдуулан цэргийн командлалаас тус улсын зүүн бүсийн Краслава, Резекне, Лудза болон Балви орчмын оршин суугчдыг гэрээсээ гарахгүй байх, байшин доторх хоёр хананы дүрмийг баримтлан хоргодохыг зөвлөжээ. Мөн нам өндөрт нисэж буй болон сэжигтэй биетэд ойртохгүй байхыг анхааруулсан байна. Зэвсэгт хүчин уг агаарын байг саатуулах зорилгоор BLAZE төрлийн сөнөөгч дрон илгээсэн ч тус төхөөрөмж Орос, Беларусийн агаарын хил рүү орохоос сэргийлэн өөрийгөө устгах горимоо ажиллуулжээ.
Урьдчилсан мэдээллээр үл мэдэгдэх нисдэг биет Латвийн зүүн хэсгийн нутаг дэвсгэрт буюу Балви бүсийн Тильжа орчимд унасан байж болзошгүй гэж үзэн газар дээрх эрлийн ажиллагааг эхлүүлээд байна.
Сүүлийн саруудад Польш, Румын, Эстони, Финланд, Литва зэрэг НАТО-гийн зүүн жигүүрийн орнуудын агаарын орон зайд нисгэгчгүй төхөөрөмж нэвтрэх тохиолдол ойр ойрхон бүртгэгдэх болсон. Украин улс Оросын Балтийн тэнгисийн боомтууд болон газрын тос тээвэрлэлтийн цэгүүдэд дроноор довтолгоо хийж буй энэ үед Оросын радио электрон саатуулалтын улмаас дронууд чиглэлээ алдан хөрш орнуудын агаарын хил рүү нэвтрэх эсвэл гибрид өдөөн хатгалга гарах эрсдэл нэмэгдэж буйд бүс нутгийн орнууд онцгой анхаарал хандуулж байна.
Эх сурвалж:
• unn.ua
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.