Дональд Трампыг хүчингийн хэрэгт буруутгасан шинэ тайланг АНУ-ын Конгресст нийтлэв
АНУ-ын Конгрессын Төлөөлөгчдийн танхимын Хууль зүйн хорооны Ардчилсан намын гишүүд Дональд Трамп болон санхүүч Жеффри Эпштейн нарын холбоо хамаарлын талаар 53 хуудас бүхий албан ёсны тайланг нийтэллээ. Уг баримт бичигт Швейцарын гоо бүсгүй шалгаруулах тэмцээний оролцогч асан, загвар өмсөгч Беатрис Кеул өөрийг нь Трамп хүчирхийлсэн хэмээн албан ёсоор мэдүүлсэн шинэ ноцтой баримт багтсан байна.
Тайланд дурдсанаар уг хэрэг 1993 оны арваннэгдүгээр сард Нью-Йорк хотын Plaza зочид буудалд болжээ. Тухайн үед 24 настай байсан Беатрис Кеул American Dream Pageant тэмцээнд оролцохоор АНУ-д очоод байсан бөгөөд хэвлэлийн өдрийн зоогийн үеэр Трамп түүнд виз олгох болон их сургуульд ороход хамтрагчаараа дамжуулан тусална гэж амласан байна. Энэ үеэр Жеффри Эпштейн өөрийгөө Трампын дотнын найз хэмээн танилцуулж, хамтдаа олон үдэшлэг зохион байгуулдаг тухай ярьжээ.
Улмаар Кеулыг зочид буудлын өрөөнд урьж авчран, ар нуруунаас нь барьж хүч хэрэглэн хүчирхийлсэн гэж хохирогч мэдэгдсэн байна. Энэ үеэр түүний даашинз урагдаж, биед нь хөхрөлт шарх үүссэн бөгөөд хэрэг гарсны дараа Трамп виз болон сургуулийн амлалтаа дахин сануулж, чимээгүй байхыг шаарджээ.
Кеул өмнө нь Британийн хэвлэлд ярихдаа халдлагыг эсэргүүцэж чадсан гэж байсан бол энэ удаа Конгрессын хороонд албан ёсоор хүчингийн гэмт хэрэгт өртсөнөө мэдүүлсэн нь анхаарал татаж байна.
Цагаан ордон болон ерөнхийлөгчийн захиргааны хэвлэлийн алба уг тайлан дахь мэдэгдлүүдийг бүхэлд нь няцааж, худал гүтгэлэг хэмээн мэдэгдэв. Тэд уг үйлдлийг Конгрессын завсрын сонгуулийн өмнө Бүгд найрамдах намын амжилтаас сонгогчдын анхаарлыг холдуулах гэсэн өрсөлдөгчдийн цөхөрсөн улс төрийн арга заль гэж үзэж байна. Дональд Трамп ч өөрийгөө бүрэн гэм буруугүй, Эпштейний үйлдсэн хэргүүдэд огт холбоогүй гэх байр сууриа тууштай хадгалсаар байна.
Хууль зүйн хорооны тайланд нийт 11 эмэгтэйн гэрчийн мэдүүлэг тусгагдсанаас тав нь Трампыг Эпштейний хүрээлэлтэй холбоотойгоор бэлгийн хүчирхийлэл үйлдсэн хэмээн шууд буруутгажээ. Эдгээрийн дотор загвар өмсөгч Стейси Уильямс болон Джилл Харт нарын мэдэгдэл багтсан бөгөөд Ардчилсан намын хууль тогтоогчид уг асуудлыг шалгах хараат бус тусгай прокурор томилохыг Хууль зүйн яамнаас шаардаад байна.
Стейси Уильямс
Трамп өмнө нь зохиолч Жин Кэрроллын нэхэмжлэлтэй иргэний шүүх хурлаар бэлгийн хүчирхийлэл болон гүтгэлгийн хэрэгт гэм буруутай нь тогтоогдож, олон сая долларын нөхөн төлбөр төлөх шийдвэр сонсож байсан түүхтэй. 1970-аад оноос хойш 20 гаруй эмэгтэй түүнийг бэлгийн дарамт, хүчирхийлэлд буруутгаж байсан бөгөөд Конгрессын шинэ тайлан, тусгай прокурор томилох уриалга нь АНУ-ын улс төрийн тавцанд эрх баригчдын эсрэг дарамтыг улам нэмэгдүүлэхээр байна.
Эх сурвалж:
• rtvi.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.