Испанид өндөр хурдны галт тэрэг мөргөлдөж 68 хүн амь үрэгджээ
Испанийн төв бүсийн Кастилья-Ла Манча мужийн нутагт өндөр хурдны хоёр галт тэрэг мөргөлдсөний улмаас 68 хүн амиа алдаж, 100 орчим иргэн бэртэж гэмтсэн ноцтой осол гарчээ. Мадрид хотоос Севилья чиглэлд нийт 544 зорчигч тээвэрлэн явсан уг шугамд гарсан ослын газарт аврах албаныхан шуурхай ажиллаж байна. Энэхүү эмгэнэлт явдал аравдугаар сарын 28-ны лхагва гаргийн өдөр тохиосон бөгөөд бэртсэн иргэдийн биеийн байдал хүнд байгаа тул хохирлын тоо цаашид ч нэмэгдэж болзошгүй байна.
Осол Толедо мужийн Урда хотхоны ойролцоо гарсан бөгөөд төрийн өмчит "Renfe" компанийн өндөр хурдны "AVE" галт тэрэг зам дээр түр зогсоод байсан хувийн "Iryo" компанийн галт тэрэгний араас хүчтэй мөргөжээ. Мөргөлдөх үед "Renfe" галт тэргэнд 397, харин "Iryo" галт тэргэнд 147 хүн зорчиж явсан юм. Хүчтэй цохилтын улмаас галт тэрэгний вагонууд төмөр замаас гарч, зарим хэсэг нь жалга болон далан руу унаснаар зорчигчид ихээр гэмтэж, нурангид дарагдсан байна.
Орон нутгийн эрх баригчдын мэдээлснээр гэмтэж бэртсэн 80-100 хүний 50 орчмынх нь биеийн байдал тун хүнд байгаа аж. Онцгой байдлын нисдэг тэрэгнүүд болон аврах албаны тусгай багууд газар дээр нь тасралтгүй ажиллаж, галт тэрэгний эвдэрсэн хэсгүүдэд түгжигдсэн иргэдийг гарган авчээ. Эмнэлгийн ажилтнууд хүнд бэртсэн зорчигчдод яаралтай тусламж үзүүлэн, ойролцоох эмнэлгүүдэд шилжүүлж байна.
Дохиоллын системд доголдол гарсны дараа төв удирдлагын төвөөс гаргасан тайлбарлах аргагүй шийдвэр болон хүний буруутай ажиллагаанаас шалтгаалан мөргөлдөөн үүссэн байж болзошгүй гэж урьдчилсан байдлаар дүгнэжээ. Одоогоор техникийн болон удирдлагын холбогдох бүх шатны үйл ажиллагааг шалгах нарийвчилсан мөрдөн байцаалтыг эхлүүлээд байна.
Испанийн Ерөнхий сайд Педро Санчес ослын талбайд очиж нөхцөл байдалтай танилцсан бөгөөд аравдугаар сарын 29-нөөс 31-нийг дуустал орон даяар гурав хоногийн гашуудал зарлажээ. Үүнтэй зэрэгцэн аюулгүй байдлыг хангах, мөрдөн шалгах ажиллагааг саадгүй явуулах үүднээс Мадрид, Сьюдад Реаль болон Андалусийн чиглэлийн өндөр хурдны төмөр замын бүх хөдөлгөөнийг түр зогсоосон байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.