Хунтайж Харригийн хадам эцэг хүчирхийллийн шинжтэй бичлэг хадгалсан хэрэгт оров
Их Британийн хунтайж Харригийн хадам эцэг буюу Сассексийн гүнгийн авхай Меган Марклын төрсөн эцэг болох 82 настай Томас Маркл хүүхдийн бэлгийн мөлжлөг, хүчирхийллийн шинжтэй дүрс бичлэг, гэрэл зураг хадгалсан хэрэгт сэжиглэгдэн олон улсын томоохон шуугианы төвд орлоо.
Хэргийн баримтууд Филиппиний Себу хотод байрлах түүний хуучин сууцнаас илэрчээ.
Томас Марклын 60 настай хүү Томас Маркл эцгийнхээ эд зүйлсийг янзалж байх үедээ хатуу диск, флаш диск, зөөврийн компьютер, хуучин гар утас агуулсан дөрвөн хайрцаг техник хэрэгсэл олжээ. Тэдгээр төхөөрөмжөөс насанд хүрээгүй хүүхдийн бэлгийн хүчирхийллийг харуулсан олон мянган зураг, бичлэг олдсон тул тэрбээр нотлох баримтыг Филиппиний Үндэсний цагдаагийн газарт хүлээлгэн өгснөөс гадна АНУ-ын Холбооны мөрдөх товчоонд хандсан байна. Түүнчлэн хүү нь эцгээсээ бүрмөсөн харилцаагаа тасалж буйгаа олон нийтэд зарлажээ.
Хэрэг явдал өрнөх явцад Томас Марклын анхны эхнэр Рослин Лавлесс 2018-2019 оны үед Британийн хуулийн байгууллагад илгээж байсан захидлын асуудал сөхөгдлөө. Тэрбээр захидалдаа хуучин нөхрөө Зүүн өмнөд Азийн орнууд руу насанд хүрээгүй 12 настай охидтой бэлгийн харьцаанд орохоор явдаг байсан тухай өгүүлсэн байжээ.
Харин Лондон хотын цагдаагийн газар буюу Скотланд-Ярд уг баримтын эх хувийг үрэгдүүлсэн шалтгаанаар Меган Марклаас өөрт нь хадгалагдаж буй хуулбарыг гаргаж өгөхийг хүссэн байна.
Сэжиглэгдэж буй Томас Маркл өөрт нь тулгасан хэргийг эрс үгүйсгэж, 18 нас хүрээгүй хүнтэй хэзээ ч холбогдож байгаагүй хэмээн мэдэгдэв. Тэрбээр нэр хүндийг нь унагах зорилгоор хэн нэгэн эдгээр файлуудыг зориуд төхөөрөмжид нь байршуулсан байж болзошгүй хэмээгээд, худал хуурмагийг илрүүлэгч аппаратаар шалгуулахад бэлэн гэжээ. Нөгөө талд Меган Маркл албан ёсны мэдэгдэл хийж, 2018 онд хуримынхаа дараахан цагдаагийн байгууллагаас эцгийнх нь талаарх сэжигтэй мэдээллийг хүлээн авснаас хойш түүнээс харилцаагаа бүрэн тасалж, үр хүүхдүүдтэйгээ уулзуулаагүй байснаа анх удаа баталсан байна.
Одоогийн байдлаар Филиппиний цагдаагийн алба АНУ-ын Холбооны мөрдөх товчоотой хамтран хураан авсан дижитал төхөөрөмжүүдэд нарийвчилсан шинжилгээ хийж эхэлжээ. Филиппиний Дотоод хэргийн сайд Жонвик Ремулла уг шинжилгээ долоо орчим хоног үргэлжлэх бөгөөд үр дүнд үндэслэн эрүүгийн хэрэг үүсгэх эсэхийг албан ёсоор шийдвэрлэнэ хэмээн мэдэгдсэн байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.