Сомалийн далайн дээрэмчид эргэн ирж, олон улсын усан тээвэрт заналхийлж эхлэв
Сомалийн далайн дээрэмчдийн халдлага сүүлийн арван жилийн хамгийн дээд түвшинд хүрч, олон улсын худалдааны хөлөг онгоцууд болон далайчдын аюулгүй байдалд ноцтой аюул учруулж эхэллээ.
Европын Холбооны "Аталанта" тэнгисийн цэргийн ажиллагааны тайлангаас үзвэл зургаан хөлөг онгоцыг нэгэн зэрэг барьцаалж, 90 далайчныг олзолсон тохиолдол гарсны зэрэгцээ "MT Eureka" болон "Honour 25" зэрэг газрын тос, түлш тээвэрлэгч томоохон хөлгүүд халдлагад өртөөд байна.
Оман улсаас Сомали руу 2700 тонн дизель түлш тээвэрлэж явсан "Honour 25" хөлөг онгоцыг зэвсэглэсэн дээрэмчид эзлэн авсан явдал нөхцөл байдал хэр ноцтой болсныг илтгэнэ. Багийн 17 гишүүн хөлгийн удирдлагын танхимд таван сар гаруй хугацаанд хоригдож, байнгын зэвсэгт харуул дор хөдөлгөөнгүй байх хатуу нөхцөлийг туулжээ. Хөлөг онгоцонд хамгаалалтын баг болон дохиоллын систем байгаагүй, хөдөлгүүр муу ажиллаж байсан нь халдлагыг амархан зохион байгуулах боломж олгосныг хөлдөө буудуулж амьд гарсан ерөнхий инженер болон хоёрдугаар инженер нар баталсан байна.
Дээрэмчид анх барьцааны төлбөрт долоон сая ам.доллар шаардаж байсан ч урт хугацааны хэлэлцээний дүнд нэг сая ам.доллар болгон бууруулжээ. Хөлөг онгоцыг чөлөөлөхөөр Пунтландын тэнгисийн цагдаагийн алба тусгай ажиллагаа явуулсан боловч харамсалтайгаар багийн таван гишүүн амиа алдсан байна.
Далайчдын аминд хэрхэн хүрсэн тухай мэдээллүүд зөрүүтэй хэвээр байгаа нь аврах ажиллагааны эрсдэл болон зэвсэгт дээрэмчдийн хэрцгий авирыг бэлхнээ харуулж байна.
Аюулгүй байдлын шинжээчдийн тайлбарлаж буйгаар дээрэмчдийн идэвхжил сэргэсэн нь Ойрхи Дорнод дахь геополитикийн зөрчилтэй шууд холбогдож байна. Хуситуудын довтолгоо болон Ирантай холбоотой сөргөлдөөний улмаас Барууны тэнгисийн цэргийн ангиуд Персийн булан болон Баб эл-Мандебын хоолой руу шилжин ажиллах болжээ. Тэнгисийн стратегийн төвийн ахлах зөвлөх Мэттью Райзенер олон улсын тэнгисийн хүчин худалдааны усан замыг хамгаалахад төвлөрөх зуур Сомалийн эрэг орчимд хамгаалалтын хоосон орон зай үүссэнийг тодотгосон юм.
Түүнчлэн худалдааны хөлөг онгоцууд дайралтаас зайлсхийхийн тулд Сомалийн эрэгт ойртон хөвөх болсон нь дээрэмчдийн бай болох шалтгааны нэг болов. Африк дахь Аюулгүй байдлын судалгааны хүрээлэнгийн шинжээч Тим Уолкерын тэмдэглэснээр, Сомали дахь эдийн засгийн хямрал, ядуурал болон түлшний үнийн өсөлт нь олон сая ам.долларын барьцаа нэхэх гэмт хэргийг өөгшүүлж байна. Тиймээс усан тээврийн компаниуд сонор сэрэмжээ эргэн сэргээж, зэвсэгт хамгаалалтыг хөлгүүддээ дахин байршуулах зайлшгүй шаардлага бий болжээ.
Эх сурвалж:
• economictimes.indiatimes.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.