Олон жил хуримтлагдсан өш хонзон Японы тэрбумтаны хүүгийн амийг авч одов уу

Японы санхүүгийн салбарт олон жилийн турш маргаан дагуулсан хүний нэг бол тэрбумтан Кэнсин Осима юм. 

Тэрбээр 1978 онд Японд "Shoko Fund" компанийг үүсгэн байгуулж, хорь орчим жилийн хугацаанд тус улсын хамгийн чинээлэг эрхмүүдийн нэг болж, "Forbes" сэтгүүлийн тэрбумтнуудын жагсаалтад багтаж байсан юм. Гэвч уг санхүүгийн корпораци хэт өндөр хүүтэй зээлийн хатуу бодлоготой байсны улмаас олон мянган зээлдэгч, гэр бүлийг дампууруулан сүйрүүлж байжээ.

Кэнсин Осиматай холбоотой олон тооны шүүхийн гомдол гарч байсан боловч олон жил хуулийн хариуцлагаас зайлсхийж чадсан төдийгүй сүүлийн жилүүдэд хоёр ч удаа амь насанд нь халдах оролдлогоос мэнд мултарч байсан түүхтэй аж.

Харин энэ оны аравдугаар сарын 14-ний орой түүний ууган хүү Есихито Осима Лаос улсын нийслэл Вьентьян хотод халдлагад өртөж, газар дээрээ амиа алдсан явдал нь түүний талаар эргэн санахад хүргээд байна. 

Орон сууцны хотхоны авто зогсоолд гарсан уг гэмт хэргийг урьдаас төлөвлөсөн захиалгат аллага болон өшөө авалт байж болзошгүй хэмээн үзэж байгаа бөгөөд гэмт этгээд хохирогчийн үнэт эд зүйлийг огт хөндөлгүй хэргийн газраас зугтжээ.

Хяналтын камерт тэмдэглэгдсэнээр тухайн өдрийн 21:10 цагийн орчимд Есихито Осима зогсоолд байсан микроавтобуснаасаа буух агшинд хар хувцастай үл таних этгээд харанхуйгаас гэнэт гарч ирэн ойрын зайнаас гурван удаа буудсан байна. Буудсан этгээд хохирогчийн түрийвч, бугуйн цаг зэрэг үнэт эд зүйлсийг авалгүйгээр шууд эргэн зугтсан нь дээрмийн зорилгогүйг тодорхой харуулж буй юм. Цагдаагийн баг хэргийн газарт ирэх хүртэл хохирогчийн цогцос гудамжны гэрлийн дор хэдэн цагийн турш байжээ.

Хэрэг гарсны дараа албаныхан болон ар гэрийнхэн мэдээллийг чандлан нууцлахыг эрмэлзжээ. Тухайлбал, Осимагийн гэр бүлийн өмгөөлөгчид аюулгүй байдлын үүднээс хэргийн талаар нийтэд мэдээлэхгүй байхыг Японы хэвлэлүүдээс хүссэн байна. Мөн, Осимагийн удирддаг нэгэн компани хэрэг явдлаас хойш тав хоногийн дараа Есихито нас барсан тухай болон түүний албан тушаал эхэд нь шилжсэн тухай сошиал хуудсандаа нийтэлсэн боловч хэдхэн цагийн дараа бичвэрээ устгажээ.

Хүүгийнхээ үхлийн тухай мэдээг эцэг Кэнсин Осима утсаар хүлээн авсан бөгөөд олон жилийн турш хуримтлагдсан өшөө хонзон ийнхүү үр хүүхдийнх нь аминд хүрч төгссөн байж болзошгүй байна. Хууль бус, мөлжлөгийн санхүүгийн схемийн гашуун үр дагавар олон жилийн дараа Лаос улсын нутаг дэвсгэрт цуст аллага болон илэрсэн гэж үзэж байна. 

Эх сурвалж:

• dzen.ru