Канадад эх, охин хоёр баавгайн халдлагад өртөж амиа алджээ
Канадын Британийн Колумби мужийн Белла Күүла суурины ойролцоо зэрлэг баавгай хүмүүс рүү дайрч, эх, охин хоёр харамсалтайгаар амиа алдсан болохыг тус улсын эрх баригчид албан ёсоор баталлаа.
Амиа алдсан иргэд нь урлагийн засалч, сургуулийн зөвлөхөөр ажилладаг Женни Балкаррас болон түүний 20 настай охин Села Рид нар байжээ. Гурван насанд хүрсэн хүүхдийн эх, эмээ Женни Балкаррас нь өнгөрсөн наймдугаар сард Төв эргийн багш нарын холбоонд ажиллахаар тус сууринд шилжин суурьшсан байв. Ар гэрийнхэн нь тэдэнтэй холбоо тасарсан тул ням гаргийн өдөр эрэн сурвалжлах хүсэлт гаргасны дагуу эрлийн баг тэдний унаж явсан тээврийн хэрэгслийг орон нутгийн уулын жимийн эхнээс олсон байна.
Хайгуулын явцад даваа гаргийн өдөр эхний буюу Женни Балкаррасын цогцсыг илрүүлжээ. Улмаар Канадын Хааны морьт цагдаагийн алба (RCMP) болон Британийн Колумби мужийн Байгаль хамгаалах албаны хамтарсан баг мягмар гаргийн үдээс хойш түүний охин Села Ридийн цогцсыг ойролцоох газраас олж тогтоосон юм.
Энэхүү явдал Ванкувер хотоос хойд зүгт 1,000 орчим километрийн зайд орших, 2,100 орчим оршин суугчтай алслагдсан Белла Күүла бүсийн уулын жимд гарчээ.
Британийн Колумбийн Байгаль хамгаалах албаны байцаагч Жефф Тайрын мэдээлснээр, хэргийн газраас илэрсэн баримтууд уг халдлагад нэгээс олон хүрэн баавгай байсан байж болзошгүйг харуулж байна. Эцсийн дүгнэлт хараахан гараагүй ч тухайн бүсээс баригдсан аливаа баавгайд шинжилгээ, үнэлгээ хийж, хүний амь насанд заналхийлсэн амьтдыг мужийн зэрлэг амьтдын бодлогын хүрээнд устгахаар төлөвлөжээ.
Хэрэг гарсантай холбогдуулан цагдаа болон байгаль хамгаалагчид халдлага үйлдсэн баавгайнуудыг илрүүлэх ажиллагааг явуулж байгаа бөгөөд орон нутгийн иргэдийн аюулгүй байдлыг хангах үүднээс Белла Күүла сууринд хөл хорих цаг тогтоогоод байна. Жилийн өмнө тус бүс нутагт хүрэн баавгай бага сургуулийн багш, сурагчдын баг руу дайрч байсан тохиолдол гарч байсан тул эрх баригчид нөхцөл байдалд онцгой анхаарал хандуулан ажиллаж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.