Их Британийн жүжигчин Рассел Брэндийг хүчирхийлэл үйлдсэн болон бэлгийн дарамт үзүүлсэн гэж шүүх үзэв
Их Британийн нэрт жүжигчин, хошин шогч Рассел Брэндийг 2026 оны арваннэгдүгээр сарын 5-ны пүрэв гаргийн өдөр Лондон хотын Саутворкын Титмийн шүүхээс хүчингийн болон бэлгийн хүчирхийллийн хэрэгт гэм буруутайд тооцож, цагдан хорихоор шийдвэрлэлээ.
Дөрвөн долоо хоногийн турш үргэлжилсэн шүүх хурлын дараа найман эрэгтэй, дөрвөн эмэгтэйгээс бүрдсэн тангарагтны бүрэлдэхүүн хоёр өдрийн турш найм гаруй цаг зөвлөлдсөний эцэст шийдвэрээ гаргасан байна. Тангарагтны шүүх 51 настай Брэндийг 2009 онд Лондоны баруун хойд хэсэг дэх Хэмпстэдийн харшдаа 21 настай шүтэн бишрэгч эмэгтэйгээ хүчирхийлсэн гэмт хэрэгт, мөн өөр гурван эмэгтэйд бэлгийн дарамт учруулсан гурван хэрэгт буруутай гэж үзжээ. Эдгээр бэлгийн хүчирхийллийн хэрэгт 2004 онд Сохо дүүргийн уушийн газарт болсон үдэшлэг дээр эмэгтэй хүний цээжинд зөвшөөрөлгүй хүрсэн, мөн 2004 эсвэл 2005 онд Лондонгийн Choice FM радиогийн байранд эмэгтэй хүнд халдсан явдлууд багтаж байна. Харин түүнд тулгасан өөр хоёр удаагийн хүчингийн хэрэг болон бэлгийн хүчирхийлэл үйлдэхийг завдсан нэг хэргийг шүүх хэрэгсэхгүй болгож цагаатгасан юм.
Шүүх хуралдааны явцад прокурорын зүгээс жүжигчнийг өөрийн нэр хүнд, нөлөөлөл болон хүрээлэн буй хүмүүсээ ашиглан эмэгтэйчүүдийг нэг удаагийн хэрэгсэл мэт үзэж дарамталдаг, тооцоотой бөгөөд "бэлгийн харгис махчин" байсан хэмээн тодорхойлжээ. Рассел Брэнд 1999-2009 оны хооронд зургаан эмэгтэйтэй холбоотой бүх буруутгалыг эрс няцааж, өөрийгөө гэм буруугүй хэмээн мэдүүлж байв.
Тэрбээр тухайн цаг үед садар самуун, сексийн донтой амьдралын хэв маягтай байснаа хүлээн зөвшөөрсөн боловч бүх харилцаа харилцан зөвшилцлийн үндсэн дээр явагдсан бөгөөд 2023 онд Channel 4 телевизийн Dispatches нэвтрүүлэг болон The Times сонины эрэн сурвалжлах нийтлэлийн дараа уг үйл явдлуудыг зориудаар гуйвуулан буруутгасан хэмээн мэдэгдсэн байна.
Хэргийг даргалагч шүүгч Жоэл Беннатан гэм буруутай нь тогтоогдсон Брэндийг зайлшгүй урт хугацааны бодит хорих ял хүлээж байгааг онцлон батлан даалтад байх эрхийг нь нэн даруй хүчингүй болгож, танхимаас шууд хорих анги руу шилжүүлэв. Шүүхийн шийдвэр гарахаас өмнө тэрбээр эхнэр Лаура руугаа харан "Лаура, би чамд хайртай" хэмээн хэлсэн бөгөөд батлан даалтыг нь цуцалж шүүхийн танхимаас авч явах үед хуулийн багийнхандаа "Би зүгээр ээ, би зүгээр" хэмээн дохиж давтан хэлж байжээ. Шүүхээс түүнд оноох ялыг 2026 оны арваннэгдүгээр сарын 9-ний даваа гаргийн өдөр албан ёсоор зарлахаар товлосон байна.
Шүүхийн шийдвэр гарсны дараа Лондон хотын Метрополитан цагдаагийн газраас жүжигчин Рассел Брэндтэй холбоотой хүчингийн нэмэлт хоёр хэргийг үргэлжлүүлэн шалгаж байгааг мэдээллээ. Цагдаагийн байгууллага шалгалтын баримт материалуудыг Титмийн прокурорын газарт хэдийн хүлээлгэн өгсөн бөгөөд түүнд цаашид шинээр ял тулгаж болзошгүй нөхцөл байдал үүсээд байна.
Эх сурвалж:
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.