Хонконгийн ардчиллын төлөө тэмцэгч Жошуа Вонгод 10 жилийн хорих ял оноолоо
Хонконгийн Дээд шүүхээс ардчиллын төлөөх хөдөлгөөний идэвхтэн, 30 настай Жошуа Вонгод гадаадын хүчинтэй хуйвалдан үндэсний аюулгүй байдалд заналхийлсэн хэргээр 10 жилийн хорих ял оноов.
Шүүхээс Жошуа Вонгийг хилийн чанадад дүрвэн гарсан идэвхтэн Натан Лоу нарын хамтаар 2020 онд БНХАУ болон Хонконгийн эрх баригчдын эсрэг эдийн засгийн хориг арга хэмжээ авахыг олон улсын засгийн газруудад уриалж, сурталчилгаа хийсэн гэм буруутайд тооцсон байна. Хэргийг шүүн тасалсан шүүгч Уильям Там үйлдлийг онц ноцтой шинжтэй хэмээн үзэж анх 13 жилийн хорих ял төлөвлөж байсан ч Жошуа Вонг гэм буруугаа хүлээн зөвшөөрсөн үндэслэлээр ялыг 10 жил болгон бууруулжээ.
Жошуа Вонг нь 2020 оны 11 дүгээр сараас хойш хоригдож байгаа юм. Тэрээр өмнө нь Хонконгийн 47 сөрөг хүчний гишүүдийн хэрэгт буруутгагдан төрийн эрхийг булаан авахыг завдсан үйлдлээр дөрвөн жил найман сарын хорих ял эдэлж байсан бөгөөд 2027 оны нэгдүгээр сард суллагдах хуваарьтай байв. Гэвч шүүхийн шинэ тогтоолоор өмнөх ялын үлдсэн хоёр сар хоёр өдрийн хугацаа шинэ 10 жилийн ялтай давхцан тооцогдохоор болж, суллагдах хугацаа 2036 оны сүүл хүртэл хойшлогдсон байна. Ингэснээр тэрээр 40 нас хүртлээ шоронд хоригдохоор болж, Үндэсний аюулгүй байдлын тухай хуулиар хоёр дахь удаагаа ял шийтгүүлсэн ардчиллын тэмцэгч боллоо.
Хүний эрхийн ажиглагч байгууллагын Азийн бүсийн захирал шүүхийн шийдвэрийг үндэслэлгүй ялласан харгис, шударга бус алхам гэж шүүмжлээд, эрх баригчид нөлөө бүхий удирдагчдыг урт хугацаагаар хорихын тулд зохиомол хэргүүдийг удаа дараа давхардуулан үүсгэж буйг онцлов.
Үүний зэрэгцээ Эмнести Интернэшнл байгууллагаас Жошуа Вонгийг суллагдахаас хэдхэн сарын өмнө дахин ялласан нь эрх баригчдын зориудын хэлмэгдүүлэлт хэмээн үзэж, түүнийг нэн даруй суллахыг шаарджээ. Түүнчлэн 2020 онд батлагдсан Үндэсний аюулгүй байдлын тухай хууль нь үзэл бодлоо чөлөөтэй илэрхийлэх эрхийг боомилох хэрэгсэл болсныг энэхүү шийдвэр дахин баталж байна хэмээн тус байгууллага дүгнэсэн байна.
Эх сурвалж:
• hrw.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.