Хүчтэй хар салхи Японы өмнөд арлуудыг чиглэн урагшилж байна
Японы өмнөд хэсгийн арлуудыг чиглэн урагшилж буй "Дельфин" хэмээх 13 дугаартай хүчтэй хар салхины улмаас тус улсын зарим бүс нутагт онцгой байдал зарлаж, нислэгүүд цуцлагдаж эхэллээ.
Номхон далайн дээгүүр цагт 15-17 километрийн хурдтайгаар баруун зүгийг чиглэн хөдөлж буй уг хар салхи нь Кадена агаарын цэргийн баазаас зүүн зүгт 1056 километрийн зайд байрлаж байна. Одоогоор "маш хүчтэй" ангилалд багтаж буй тус хар салхины төв хэсгийн агаарын даралт 943-945 гектопаскаль хүрч, салхины хурд нь цагт 144-өөс 162 километр, зарим үед цагт 216 километр хүртэл ширүүсэж байна.
Цаг уурын урьдчилсан мэдээгээр, "Дельфин" хар салхи өнгөрсөн мягмар гаргийн буюу наймдугаар сарын 4-ний өдөр Японы Огасавара арлуудад анхны цохилтоо өгч, хүчтэй салхи, аадар бороо тус бүс нутагт оржээ.
Улмаар пүрэв гаргийн буюу наймдугаар сарын 6-ны өдөр Окинава мужийн Дайто болон Амами арлуудад ойртох төлөвтэй байна. Харин баасан гаргийн буюу наймдугаар сарын 7-ны өдөр Окинавагийн гол арлаар дайран өнгөрч, Зүүн Хятадын тэнгисийг чиглэх урсгалтай байгаа бөгөөд наймдугаар сарын 8-ны өдрийг хүртэл тус бүс нутагт аадар бороо, хүчтэй салхи үргэлжлэн шуурах төлөвтэй байна.
Цагт 216 километр хүртэл ширүүсэх салхины хүч нь модны мөчир хугалах, цахилгааны шугам болон холбооны шонгуудыг унагах, байшин барилгын бүтцэд ноцтой хохирол учруулах хэмжээний аюултай юм.
"Дельфин" хар салхи нь анх долоодугаар сарын 26-ны өдөр халуун орны нам даралтын бүсээс үүсэж, далайн гадаргын хэм Цельсийн 30 хэм хүрч дулаарсны улмаас маш хурдацтай хүчээ авчээ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.