АНУ-ын арми Ирантай хийсэн дайны улмаас пуужингийн нөөцөө шавхжээ
АНУ-ын арми Иран улстай таван сарын турш хийж буй зэвсэгт мөргөлдөөний улмаас алсын тусгалтай, өндөр нарийвчлалтай хуурай замын гол пуужингуудынхаа нөөцийг бүрэн шавхсан тухай Ройтерс агентлаг 2026 оны наймдугаар сарын 4-ний өдөр мэдээллээ.
Цэргийн дотоод мэдээллээс үзвэл, АНУ-ын зэвсэгт хүчин довтлох болон хамгаалах зориулалттай зэвсгийн нөөцийн асар их хомстолд оржээ.
АНУ-ын арми нэг бүр нь нэг сая гаруй ам.долларын өртөгтэй тактикийн пуужингийн систем (ATACMS) болон шинээр зэвсэглэлд нэвтрүүлж буй нарийвчлалтай цохилтын пуужингийн (PrSM) дэлхий дахины нөөцөө бараг бүхэлд нь ашиглаж дуусгасан байна. Зэвсэгт хүчин 300 км-ийн тусгалтай хуучин ATACMS пуужингуудыг халж, 500 км-ийн тусгалтай шинэ PrSM пуужингаар солих шилжилтийн шатандаа явж байсан тул ийнхүү хомстолд оржээ. Шинэ пуужингууд саяхнаас л зэвсэглэлд шилжсэн тул Иран дахь дайны хурдацтай хэрэглээг нөхөх хэмжээний үйлдвэрлэл хараахан хийгдээгүй байв. Үүнээс гадна Томагавк (Tomahawk) далавчит пуужингийн дэлхий даяарх нөөцийн тал орчим хувийг хэдийн зарцуулаад байна.
Довтлох зэвсгээс гадна агаарын хамгаалалтын пуужингуудын нөөц мөн аюултай түвшинд хүрч буурчээ. Стратеги болон олон улсын судалгааны төвийн (CSIS) тайланд дурдсанаар, АНУ дайн эхлэхэд 2330 ширхэг Патриот (Patriot) пуужингийн нөөцтэй байсан бол долоодугаар сарын сүүлчээр энэ тоо 759-өөс 827 болж цөөрсөн байна. Мөн THAAD системийн пуужингийн нөөц 452 байснаас 234-278 болтлоо буурчээ.
Эдгээр агаарын хамгаалалтын пуужингийн нөөцийг дайны өмнөх түвшинд хүргэж сэргээхэд хамгийн багадаа 2029 оны дунд үе хүртэл хугацаа шаардлагатай гэж шинжээчид үзэж байна.
Үүнтэй холбогдуулан Пентагон Локхид Мартин (Lockheed Martin) компанитай 58.6 тэрбум ам.долларын түүхэн гэрээ байгуулж, RTX компанид PAC-2 пуужин үйлдвэрлэх 441 сая ам.долларын захиалга өгчээ.
Ерөнхийлөгч Дональд Трамп Цагаан ордны мэдэгдэлдээ АНУ дэлхийн аль ч улсаас илүү зэвсгийн нөөцтэй бөгөөд батлан хамгаалахын компаниуд дээд хурдаараа үйлдвэрлэлээ өргөжүүлж байгааг онцолж, мэдээллийг үгүйсгэв.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.