Румын улс хүрэн баавгайн тоо толгойг цөөлөх агнуурын квотыг хоёр дахин нэмэгдүүллээ
Румын улсын Үндсэн хуулийн шүүхээс хүн болон зэрлэг амьтдын мөргөлдөөнийг бууруулах зорилгоор жил бүр агнах хүрэн баавгайн тоог хоёр дахин нэмэгдүүлж, 900 орчимд хүргэх шийдвэрийг баталлаа.
Европын холбооны хэмжээнд ОХУ-ыг эс тооцвол хамгийн их баавгайн популяцитай тус улсад сүүлийн жилүүдэд зэрлэг амьтдын дайралт эрс нэмэгдэж, иргэдийн аюулгүй байдалд заналхийлэх болсон тул ийм арга хэмжээ авахаас өөр аргагүйд хүрсэн гэж албаныхан тайлбарлаж байна. Гэвч байгаль хамгаалагчид болон мэргэжилтнүүд тус шийдвэрийг бодит асуудлыг шийдэж чадахгүй, үр дүнгүй алхам хэмээн эрс шүүмжилжээ.
Тус улсын Байгаль орчны яамны ДНХ-ийн судалгаанд үндэслэн гаргасан тооцоогоор Румынд одоогоор 10,000-13,000 орчим хүрэн баавгай амьдарч байна. Сүүлийн хорин жилийн хугацаанд баавгайн дайралтын улмаас 30 орчим хүн амь үрэгдсэн бөгөөд зөвхөн 2024-2026 оны хооронд зэрлэг махчин амьтад 1,800 гаруй мал, гэрийн тэжээвэр амьтдыг хороожээ. Предеал зэрэг уулархаг бүсийн хотуудын оршин суугчид орой бүр хогийн сав нэгжих баавгайнуудаас айж, шөнийн цагаар гэрээсээ гарахаас эмээх хэмжээнд хүрээд байгааг албаны эх сурвалжууд мэдээлж байна.
Хүн ба зэрлэг амьтдын харилцаанд үүссэн хямралыг илтгэх нэгэн тод жишээ Карпатын нурууны үзэсгэлэнт Трансфагарасан уулын замд саяхан гарчээ. Нартай нэгэн өглөө ердөө гурван цагийн дотор ойгоос дор хаяж 20 хүрэн баавгай гарч ирэн, замаар зорчиж байсан жолооч нарт ойртсон байна. Авто замын эргэлт бүрд баавгай хооллох нь хууль бус бөгөөд өндөр торгуультайг анхааруулсан тэмдэг байсаар атал аялагчид машинаа зогсоон, тэдэнд хоол өгч, хамтдаа зураг авхуулж байв.
2021 оноос хойш орон нутгийн захиргаанд иргэдийн гэр орон, хашаа руу шууд халдсан баавгайг буудах эрхийг олгосон бөгөөд энэ нь хүн амын суурьшлын бүсийг хамгаалах нэг арга хэрэгсэл болж байна.
Цаашид Румын улс зөвхөн агнуурын квотыг нэмэгдүүлээд зогсохгүй, зэрлэг амьтдыг хооллохгүй байх хуулийн хэрэгжилтийг чангатгах, хог хаягдлын системийг сайжруулах зэрэг цогц арга хэмжээ авах шаардлагатай тулгарч байна. Хүн болон зэрлэг байгалийн тэнцвэрт байдлыг хадгалахын тулд урьдчилан сэргийлэх механизмыг боловсронгуй болгох нь урт хугацааны тогтвортой шийдэл болохыг мэргэжилтнүүд онцолж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.