Москвагийн төв дэх ресторанд дэлбэрэлт болж гурван хүн амиа алджээ
Оросын Холбооны Улсын нийслэл Москва хотын төвд байрлах тансаг зэрэглэлийн ресторанд гар хийцийн тэсрэх бөмбөг дэлбэрч, гурван хүн амиа алдаж, 20 орчим хүн шархадсан хэрэг гарчээ.
Орон нутгийн цагаар бямба гаргийн оройн 20:00 цагийн орчимд Кудринская талбайд байрлах "Balzi Rossi" итали ресторанд уг дэлбэрэлт болсон байна. Оросын Терроризмын эсрэг үндэсний хорооноос уг хэргийг амиа золиослогч эмэгтэйн авч явсан тэсрэх төхөөрөмжөөс үүдэлтэй болохыг баталжээ.
Албаны эх сурвалжуудын мэдээлснээр, дэлбэрэлтийн улмаас нийт гурван хүн газар дээрээ амиа алдсаны дотор тэсрэх бөмбөг тээвэрлэж явсан сэжигтэн эмэгтэй, рестораны хамгаалалтын ажилтан болон нэг үйлчлүүлэгч байжээ. Түүнчлэн хэргийн улмаас 15-21 хүн гэмтэл авч, эмнэлгийн тусламж авсан байна.
Терроризмын эсрэг хорооны мэдээлснээр, нэр нь тодорхойгүй эмэгтэй тэсрэх төхөөрөмжийг рестораны дотор тал руу нэвтрүүлэхийг оролдсон байна. Гэвч үүдэнд зогсож байсан хамгаалалтын ажилтан түүнийг зогсоож, шалгах үед бөмбөг дэлбэрчээ. Оросын "Коммерсант" сонины мэдээлснээр, халдлага үйлдэгч нь рестораны зуны задгай талбайд сууж байсан зочдыг онилсон байх магадлалтай аж. Хэрэг гарсан өдөр тус ресторан олон нийтэд үйлчлэхгүй хаалттай байсан бөгөөд хувийн арга хэмжээ зохион байгуулагдаж байжээ.
Эх сурвалж:
• keyt.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.