Иран улс Ойрхи Дорнодын эрчим хүчний байгууламжуудад цохилт өгөхөөр заналхийлэв
АНУ-ын зүгээс Ираны байгууламжуудад цохилт өгвөл Ойрхи Дорнод дахь эрчим хүчний дэд бүтцэд хариу цохилт өгнө хэмээн анхаарууллаа.
Ираны Үндэсний аюулгүй байдлын дээд зөвлөлтэй холбоотой "Nournews" агентлаг 2026 оны наймдугаар сарын 1-ний бямба гаргийн мэдэгдэлдээ хэрэв АНУ халдлага үйлдвэл Саудын Араб, Арабын Нэгдсэн Эмират Улсын газрын тосны ордууд, мөн Катар, Израилийн байгалийн хийн ордуудыг "үнсэн товрого болгоно" гэж заналхийлсэн байна. Энэхүү мэдэгдэл нь бүс нутгийн хэмжээнд томоохон мөргөлдөөн үүсэх, дэлхийн эрчим хүчний зах зээлд саатал учрах эрсдэлийг нэмэгдүүлж байна.
Кувейтийн зэвсэгт хүчин бямба гаргийн үүрээр Ираны дайралтын дронуудыг илрүүлж, устгаснаа зарласан юм. Эдгээр дронууд нь Кувейтийн хойд хэсэгт орших засгийн газрын байгууламж болон Бубиян арал дээрх хувийн компанийн иргэний тээврийн хэрэгслүүдийг онилсон бөгөөд унасан хэлтэрхийнүүд нь эд хөрөнгийн хохирол учруулж, хүний амь нас эрсдээгүй байна.
АНУ-ын Ерөнхийлөгч Дональд Трамп Иранчуудыг "өгсөн амлалтаа байнга зөрчдөг" тул тэдэнд итгэхгүй байгаагаа тэмдэглээд, АНУ тэдэнд хүчтэй цохилт өгөх болно гэж мэдэгджээ. АНУ-ын хэвлэл мэдээллийн хэрэгслүүдийн мэдээлснээр, Цагаан ордон болон Израиль улс Ираны цахилгаан станц, газрын тос боловсруулах үйлдвэр зэрэг эрчим хүчний дэд бүтцийг онилсон бөмбөгдөлтийн төлөвлөгөөг хянаж үзсэн байна. Гэсэн хэдий ч Трамп дипломат тохиролцоонд хүрч чадна гэдэгт итгэсэн хэвээр байгаагаа илэрхийлжээ.
АНУ болон Израиль 2026 оны хоёрдугаар сарын 28-нд Иранд анхны цохилтоо өгснөөс хойш дэлхийн эрчим хүчний үнэ өндөр түвшинд хүрсэн хэвээр байна. Ормузын хоолойн орчимд тээвэрлэлт тасалдах вий гэсэн болгоомжлолоос үүдэн Брент маркийн түүхий газрын тосны фьючерс үнэ зөвхөн долоодугаар сард 24 хувиар өсжээ. Одоогийн байдлаар Ираны дотоодод АНУ-ын томоохон дайралт болж болзошгүй гэсэн мэдээллээс үүдэн иргэдийн дунд түгшүүр нэмэгдэж, шатахуун түгээх станцуудад урт дараалал үүсээд байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.