Японы Кюшү аралд хүчтэй газар хөдлөлт улмаас амь үрэгдэгсдийн тоо 35 хүрлээ

Японы баруун өмнөд хэсэгт орших Кюшү арлын Күмамото мужид долоодугаар сарын 28-ны мягмар гаргийн үдээс хойш 7.1 магнитудын хүчтэй газар хөдлөлт болсны улмаас амиа алдсан хүний тоо 35-д хүрч, 123 хүн бэртэж гэмтээд байна. 

Гамшигт нэрвэгдсэн бүс нутгуудад буюу Кашима хотын "Aeon Mall Kumamoto" худалдааны төвөөс 3000 гаруй үйлчлүүлэгчийг аюулгүй нүүлгэн шилжүүлснээс 80 орчим минутын дараа хийн алдагдлын улмаас хүчтэй дэлбэрэлт болж, барилгын хоёрдугаар давхар бүрэн нуржээ. Нуранги дороос 12 хүнийг гаргаж авснаас долоо нь амиа алдсан байна.

Мөн Яцүширо хотын "Nippon Paper Industries" цаасны үйлдвэрийн аварга яндан нурсны улмаас 11 ажилтан дарагдаж, тэдний ес нь амиа алджээ. Түүнчлэн Хикава тосгонд 120 гаруй орон сууц, захиргааны барилга нурсан бөгөөд амиа алдагсдын дунд кран нурах үеэр дарагдсан Вьетнам улсын дадлагажигч ажилтан байжээ. 

Бүс нутагт агаарын температур 35-40 хэм хүрч халж байгаа нь аврагчид, алба хаагчдын ажилд саад учруулж, иргэдийг халуунд цохиулах эрсдэлийг үүсгэж байна. Одоогийн байдлаар 23 мянга гаруй өрх цахилгаангүй, 75 мянган өрх ундны усны хангамжгүй болоод байна. Нийт 267 мянга гаруй оршин суугчийг нүүлгэн шилжүүлэх шийдвэр гарч, 15 мянга орчим иргэн түр хоргодох 400 гаруй байранд байрлаж байгаа тул цэргийнхэн зөөврийн агааржуулагч суурилуулах, ундны ус түгээх ажлыг гүйцэтгэж байна.

Авто үйлдвэрлэлийн "Toyota" компани ханган нийлүүлэлт болон ложистикийн хохирлыг үнэлэх зорилгоор гурван үйлдвэрийнхээ үйл ажиллагааг зогсоосон бол "Honda" компани мотоциклийн үйлдвэрээ түр хугацаагаар хаагаад байна.

Эх сурвалж:

• japantoday.com

• unn.ua

• theguardian.com

• courthousenews.com

• itij.com