Налайх дүүрэгт шинэ дулааны станцын бүтээн байгуулалт эхэллээ

Налайх дүүрэгт шинэ дулааны станц барих төслийн барилгын суурь тавих ёслол өнөөдөр боллоо. Арга хэмжээнд УИХ-ын гишүүн, Хууль зүй, дотоод хэргийн сайд С.Амарсайхан, УИХ-ын гишүүн, Байгаль орчин, уур амьсгалын өөрчлөлтийн сайд Ц.Сандаг-Очир, Налайх дүүргийн удирдлагууд болон иргэдийн төлөөлөл оролцов.

Улсын төсвийн 53.8 тэрбум төгрөгийн хөрөнгө оруулалтаар хэрэгжих энэхүү төсөл нь Налайх дүүргийн гуравдугаар хорооны нутаг дэвсгэрт баригдах бөгөөд эхний ээлжинд 79 МВт-ын хүчин чадалтай дулааны станц ашиглалтад орох юм. Ингэснээр 7,900 өрх, цаашлаад 13-19 мянган айлын орон сууцыг төвлөрсөн дулаан хангамжаар хангах боломж бүрдэх аж.

Төсөл нийт гурван үе шаттай хэрэгжиж, 256 МВт-ын хүчин чадалтай дулааны эх үүсвэртэй болохоор төлөвлөгджээ. Мөн 1.4 км урт дулаан дамжуулах шинэ шугам сүлжээ байгуулж, 0.5 км шугамыг өргөтгөн шинэчлэхээр төлөвлөсөн байна.

Ёслолын үеэр УИХ-ын гишүүн, ХЗДХ-ийн сайд С.Амарсайхан сайд хэлсэн үгэндээ, шинэ дулааны станц нь зөвхөн инженерийн дэд бүтцийн төсөл бус Налайх дүүргийн урт хугацааны хөгжил, орон сууцжуулалт, агаарын бохирдлыг бууруулах, эрчим хүчний найдвартай байдлыг дээшлүүлэхэд чухал ач холбогдолтой стратегийн бүтээн байгуулалт болохыг онцоллоо.

Шинэ дулааны эх үүсвэр ашиглалтад орсноор орон сууцны хороолол, сургууль, цэцэрлэг, эмнэлэг зэрэг нийгмийн дэд бүтцийн төслүүдийг хэрэгжүүлэх суурь нөхцөл бүрдэхээс гадна хөрөнгө оруулалт татах боломж нэмэгдэж, гэр хорооллын айл өрхүүдийг төвлөрсөн дулаанд холбох нөхцөл сайжрах юм. Хүн амын өсөлт, бүтээн байгуулалтын эрчим нэмэгдэж буй Налайх дүүргийг бүсчилсэн хөгжлийн бодлогын хүрээнд аялал жуулчлал, аж үйлдвэр хосолсон орчин үеийн хот болгон хөгжүүлэх зорилт тавин ажиллаж байна.

Энэ хүрээнд нэгдсэн стандарттай, ногоон орчин бүхий, амьдрах таатай нөхцөлтэй жишиг хотын ерөнхий төлөвлөлтийг олон улсын инженерүүдийн оролцоотой боловсруулжээ. Мөн 7,850 га талбайд “Налуу-Ухаа” эдийн засгийн тусгай бүс байгуулахаар төлөвлөж, Улаанбаатар–Чойр–Замын-Үүд чиглэлийн тээврийн коридорыг түшиглэн логистик, боловсруулах болон хөнгөн үйлдвэрлэлийн томоохон төв болгон хөгжүүлэхээр ажиллаж байгаа аж. Налайхын үйлдвэр, технологийн паркт одоогоор 10 гаруй аж ахуйн нэгж үйл ажиллагаа явуулж, найман үйлдвэрийн барилга ашиглалтад ороод байна.