Хүрээ цам Даншиг наадамд X Богд зочилно

Хүй долоо худагт өнөөдөр буюу 2026 оны 6 дугаар сарын 27-ны өдөр “Хүрээ цам-Даншиг наадам 2026” шашин, соёлын наадам албан ёсоор эхэллээ.

Нийслэл Улаанбаатар хотын иргэдийн өдөрт зориулан зохион байгуулж буй тус наадам нь ард түмний оюун санааны нэгдэл, бурхан шашны өв соёлыг жуулчдад сурталчлах зорилготой бөгөөд хоёр өдрийн турш үргэлжлэх юм.

Наадмын нээлтийн үйл ажиллагаа өглөөний 10:00 цагт ард түмнийг ивээгч их Очирваань бурхны тахилга болон Эзэн Богд Чингис хааны тахилгын зан үйлээр эхэлсэн байна. Түүхэндээ анхдугаар Богд Өндөр гэгээн Занабазарыг шашны тэргүүнд өргөмжилсөн үеэс эхтэй тус наадмын үеэр Гандантэгчэнлин хийдээс Богдын дүрүүдийн залгамж халааг хүндэтгэх шашны зан үйлүүдийг удирдан явуулж байна. Тус наадамд 10-р Богд Жавзандамба хутагт биечлэн оролцоно гэсэн мэдээлэл байна.

Энэ жилийн наадмын хүчит бөхийн барилдаанд улс, аймаг, сумын алдар цолтой 256 бөх зодоглож байна. Барилдаанд Улсын арслан Э.Оюунболд, Улсын заан Д.Анар тэргүүтэй хүчтэнүүд уран мэхийг уралдуулан барилдаж байгаа бөгөөд түрүү бөхийн бай шагналыг 30 сая төгрөгөөр товложээ.

Мөн Гандантэгчэнлин хийдийн 200 гаруй лам нарын бүрэлдэхүүнтэй баг "Хүрээ цам" харайх ёслол, сор залах, соёмбот туг залах, шашны сүлд дуулал эгшиглүүлэх зэрэг соёлын өвийг танилцуулж байна. Үүнээс гадна лам нарын дунд ном хаялцах, мэтгэлцэх, балин тосон урлалын тэмцээнүүд явагдаж байгаа бөгөөд сур харваа, шагайн харваа, сээр цохих тэмцээнүүд зохион байгуулагдаж байна.

Түүнчлэн шүлхий өвчний дэгдэлттэй холбогдуулан Нийслэлийн онцгой комиссоос урьдчилан сэргийлэх шийдвэр гаргаж, энэ жилийн наадмын хөтөлбөрөөс морин уралдаан болон морьт харвааг хассан байна. Энэхүү өөрчлөлт нь малын гоц халдварт өвчний тархалтыг хязгаарлах, аюулгүй байдлыг хангах зорилготой юм.

Наадмыг зорин очих иргэдэд зориулж Хүй долоо худаг чиглэлд 07:00-23:00 цагийн хооронд нийтийн тээврийн автобус үнэ төлбөргүй үйлчилж байна. Наадмын талбайд гар урлал, жижиг дунд үйлдвэрлэлийн үзэсгэлэн худалдаа болон хоол, үйлчилгээний 170 гаруй цэг ажиллаж байгаа бөгөөд тус арга хэмжээ нь өв соёлыг сурталчлах өргөн хүрээний цогц ажил болон өргөжиж байна.