Орос улсыг цэргийн давшилтаа хэтрүүлэн сурталчилж байна гэв

Цэргийн шинжээчид, хараат бус ажиглагчид болон Украины фронтын шугамын цэргүүдийн мэдээлснээр, "Оросын тал Украины зүүн хэсэгт хурдан давшиж байгаа тухай мэдээллээ хэтрүүлэн сурталчилж байна" хэмээн үзэж буйгаа илэрхийлэв. 

Оросын зэвсэгт хүчин Донецк мужид аажмаар урагшилж байгаа ч Кремль өөрийн амжилтыг зориуд өсгөн харуулж, ялалт нь гарцаагүй мэт сэтгэгдэл төрүүлэхийг оролдож байгааг шинжээчид онцолж байна.

Оросын арми одоогоор Донецк мужид цэргийн хүчээ голлон төвлөрүүлж байгаа бөгөөд Лиман болон стратегийн чухал ач холбогдолтой "бэхлэлтийн бүс" болох Костянтинивка хотыг бүслэн авахыг зорьж байна. Энэхүү бэхлэлтийн бүс нь Донбассын хамгаалалт болон ложистикийн сүлжээний гол тулгуур болсон үйлдвэрлэлийн хотууд, авто зам, төмөр замуудаас бүрддэг юм. Сүүлийн үед Оросын тал Покровск, Лиман, Костянтинивка орчимд агаарын цохилт болон явган цэргийн дайралтаа эрс эрчимжүүлж, Украины хамгаалалтыг сулруулахыг оролдож байгаа юм.

Оросын төрийн мэдээллийн хэрэгслүүдийн мэдээлэл болон фронтын шугам дээрх бодит байдал хоорондоо ихээхэн зөрж байна.

Тухайлбал, 2026 оны зургаадугаар сарын 22-ны даваа гарагт Оросын ТАСС агентлаг Костянтинивка хотын зүүн хэсгийг бүрэн хяналтдаа авч, зүүн хойд зах руу ойртож байгаа талаар мэдээлсэн юм. Гэвч АНУ-ын Вашингтон хотод төвтэй Дайн судлалын хүрээлэн (ISW) энэхүү мэдээллийг "үндэслэлгүй бөгөөд хэтрүүлэгтэй" гэж үзэв. Оросын талын хяналтад орсон гэх тус хотын газар нутаг нь одоогоор аль ч тал нь бүрэн хяналтаа тогтоогоогүй "саарал бүс" хэвээр байгаа ажээ.

Оросын зэвсэгт хүчин ялгуусан амжилтын оронд асар их нөөц шаардсан, удаан тактикийг ашиглаж байна. 

Дайн судлалын хүрээлэнгийн Оросын асуудал хариуцсан багийн ахлагч Катерина Степаненкогийн тайлбарласнаар, Оросын давшилт нь фронтыг сэтлэх бус, харин "нэвтрэн орох" тактикаар явагдаж байгаа юм. Тэд нэг удаад ердөө нэгээс хоёр цэрэг бүхий маш жижиг бүлгүүдийг тодорхой байрлалууд руу илгээж байна. Эдгээр жижиг бүлгүүд нь тогтвортой байрлалыг эзэлж чадахгүй байгаа тул Оросын арми тухайн газар нутагт хяналтаа бүрэн тогтоохын тулд ихээхэн цаг хугацаа, нөөц шаардаж байна гэв.

Фронтын шугамд үүрэг гүйцэтгэж буй Украины цэргүүд "нөхцөл байдлыг хүнд боловч хяналтад байгаа" гэж тодорхойлж байна. Часив Яр хотод тулалдаж буй Украины механикжуулсан 24-р бригадын хэвлэлийн төлөөлөгчийн мэдээлснээр, Оросын агаарын цохилт эрс нэмэгдсэний улмаас Костянтинивка чиглэлд нөхцөл байдал эрс муудсан байна. Гэсэн хэдий ч Украины дайчид дарамт шахалт ихэссэн ч нөхцөл байдлыг зохицуулах боломжтой бөгөөд Оросын хуурай замын цэргийн хөдөлгөөн маш удаан байгааг онцолжээ.

Цэргийн болон геополитикийн шинжээчид Москва ийнхүү амжилтаа хэтрүүлэн мэдээлж байгаагийн цаана хэд хэдэн шалтгаан байна гэж үзэж байна. 

Нэгдүгээрт, Кремль өөрийн нутаг дэвсгэрт хийгдсэн Украины амжилттай цохилтуудын дотоод дахь улс төрийн нөлөөг дарахын тулд амжилтын тухай хуурамч мэдээллийг түгээж байна. Хоёрдугаарт, Дайн судлалын хүрээлэнгийн шинжээчдийн үзэж байгаагаар, Орос улс барууны холбоотнуудад өөрсдийн ялалтыг гарцаагүй мэтээр харуулахын тулд тоон мэдээллийг зориуд өсгөж, хуурамч тайлан ашигладаг байна. Ингэснээр тэд Украиныг болон түүний түншүүдийг энхийн хэлэлцээрийн явцад газар нутгийн буулт хийлгэхээр шахалт үзүүлэхийг зорьж байна гэлээ.