МУГТ О.Насанбурмаа: Шүүмжилж, доромжилж байхаар ядахдаа нэг өдрийн бэлтгэлийг нүдээрээ үзмээр байна!

Дэлхийн аваргын хүрэл, хошой мөнгөн медальтай, Монгол Улсын гавьяат тамирчин /МУГТ/ Д.Отгонжаргал олимпын хүрэл медалийн төлөөх барилдаанд Хятадын бөх Зычи Фендтэй барилдаж, ялагдал хүлээсэн билээ. Түүнийг олимпын наадмаас медаль хүртэнэ хэмээн бөх сонирхогчид төдийгүй, Монголын ард түмэн найдвар тавьж байв. Харамсалтай нь хүрэл медалийн төлөөх барилдаанд ийнхүү ялагдал хүлээж, шагналт V байр шалгарлаа. Д.Отгонжаргалын барилдааныг шүүмжлэх нэгэн байгаа ч бүх боломжоо дайчлан барилдсан хэмээн мэргэжлийн тамирчдын зүгээс үнэлж буй юм. МУГТ О.Насанбурмаа дараах байр суурийг илэрхийлжээ.

МУГТ О.Насанбурмаа:

-Монгол Улсад олон улсын стандартын дагуу баригдсан, төвлөрсөн ганц бэлтгэлийн бааз өнөөдрийг хүртэл байдаггүй гэж бодохоор л гол харламаар. Бид бүгдээрээ л дүүгээ медаль авчаасай гээд мөн ч их залбирч хүлээж байлаа, гэхдээ болсонгүйдээ!!!

Дүү минь чадлынхаа хэрээр эцсээ хүртэл сайхан л үзлээ. Ямар амьдралаас гарч ирж, яаж өөрийгөө золиосолж, ямар их тэвчээр гаргаж, хайртай дуртай спортдоо амжилт гаргах гэж, эх орныхоо нэрийг өндөрт өргөж, аав ээж, ард түмнээ баярлуулахын тулд тэмцэж байсныг нь бодохоор дотор харанхуйлаад байх юм. Медаль авчихвал өөрийнх нь амьдрал нь жоохон ч гэсэн дээшлэх байх гээд л залбирч суулаа. Хаа байгаа зурагтын эцсээс өвлийн хүйтэн, зуны халууныг ажралгүй Нисэхийн тойрогт нэг ч өдөр таслалгүй 10 жил бусдаас илүү шаргуу хөдөлмөрлөснийхөө үр дүнд, анхныхаа Олимпод оролцож, Дэлхийн аварга шалгаруулах тэмцээнд хоёр мөнгө, нэг хүрэл медаль, гурван жил дараалан хүртсэн жаахан дүүгээрээ бахархаж байна. Энэ жил 22-хон настай дүүд минь олон амжилт ирээдүй хүлээж байгаа шүү! Ялагдал болгон сургамж болж, Ялалт бүр нь урам болно оо миний дүү!

Одоо тэр элдэвлээд, доромжлоод байгаа хүмүүс хандаад хэдэн үг хэлмээр байна! Бид нарыг элдэвлэж, шүүмжилж, доромжилж байхаар нийтээрээ монголынхоо олон сайхан тамирчдаа дэмжиж, амжилт гаргахад нөлөөлөх жижиг ч болтугай тус хийгээд, ядахдаа нэг өдрийн бэлтгэлийг нүдээрээ үзмээр байна!

Жишээ нь: Жилдээ ганцхан удаа, дөрвөн жилдээ ганцхан удаа болдог олимп, Дэлхийн аваргыг телевизээр үзчихээд амжилт гаргавал тултал магтаад, хожигдвол муулдаг жишиг олон жил тогтлоо. Өнгөцхөн хараад дүгнэлт их хийж байна!

Отгоо дүү минь нэг өвдөгнийх нь чагтан холбоос тасарсан, нөгөө өвдөг нь мэнэсхний урагдалдтай байгаа, хоёр, гурван жил хөлөө чирээд л эмчилгээ хийлгэж, байнгын үе мөч чангалах дасгал хийж, аргацаасаар энэ Олимпыг зорьсон. Даанч санасандаа хүрсэнгүй ээ.

Одоо ирээд хамгийн түрүүнд хагалгаа хийлгэх хэрэгтэй!!! Яадахдаа эрүүл байх чухал байна! Дэлхийн гурван медальтай тамирчин өнөөдрийг хүртэл өөрийн гэсэн орох оронгүй л явж байна, энэ тал дээр анхаармаар юм!!!

Энэ охинд амьдралын баталгаа хэрэгтэй! Санаа зоволтгүй бэлтгэл хийхэд энэ бол маш том хөшүүргэ!

Манай чөлөөт бөхийнхөн тэгтлээ овоож оцойтлоо олон байр, унах унаагаар шагнуулаад байдаггүй. Шагнал, ёондоо өгөөд байдаг тэмцээн ч бараг байхгүй! Хахаж цадталаа баяжсан тамирчин бол байхгүй! Олон дэлхийн медальтан амьдралын баталгаа битгий хэл, гаргасан амжилтаа ч үнэлүүлж, энгэрээ ч цоолуулж чадалгүй хөлстэй зааландаа ноцолдсоор л байгаа! Цөөхөн хэдэн спортод дуртай дэмжигчид, компанийн удирдлагууд маань зарим тамирчдыг, сэтгэл зүрхээрээ дэмжиж, спонсорлодог. Сүүлд Чөлөөт бөхийн холбоо маань шинэчлэгдээд нүдэнд харагдахуйц олон өөрчлөлт гарч, олон жил бугшсан хэл ам жоохон тасарч, шударга ёс тогтож байгаа нь сайшаалтай!

Гүй ээ тэгээд хүн гэдэг чинь урмын амьтан, ганц сайхан үг хэлээд, бэлтгэл хийж байгаа газар нь очоод, ганц хроп ус, ганцхан амино витамин дөхүүлж өгөөд, дэмждэг шүү хичээгээрэй, энэ алдаан дээрээ жоохон ажилаарай гээд хэлэхэд юу нь болохгүй гэж!

Шигшээ багийн тамирчид бэлтгэл хийдэг Спортын ордны заалны дэвжээг хүртэл солимоор байна. Монгол Улсад олон улсын стандартын дагуу баригдсан төвлөрсөн ганцхан бэлтгэлийн бааз өнөөдрийг хүртэл байдаггүй гэж бодохоор л гол харламаар байна!! Нэмж хэлэхэд чөлөөтийн есөн тамирчнаас дөнгөж хоёр нь тэмцээнээ өндөрлүүллээ! Ахиад 7 асаалттай танк байгаа шүү манайхаан!

Бүх тамирчдадаа мохоолгүй урам хайрлаж, дэмжие гэж уриалъя даа баярлалаа.